Vawiin khan MNF Party chuan thuchhuah siamin, “October ni 2, 2022 khan Bairabi Zophaiah Assam Police-ten buk pahnih an rawn sa a, Chief Minister Pu Zoramthanga chuan, a hriat veleh Assam Chief Minister leh Home Minister ni bawk, Himanta Biswas Sharma leh Border Area Dev. Minister Atul Bora chu telephone-a biain, an ṭhiah loh chuan indawrna kal mek pawh a bahlah thei a, thil ṭhalo zawk a thlen theih thu a hrilh a, chu mi hnuah Assam lam vekin an buk sak chu an ṭhiat leh nghal a ni. Chief Minister Pu Zoramthanga hmalakna hi MNF chuan chhuanawm kan tiin, anmahni buk sak ṭhiah tir leh tu Chief Minister huaisen tak hi kan chhuang takzet a ni. Ramri chungchangah inbiakna kal pui mek laia Assam lamin ngawhngawl chhuah a, hma an la fo mai hi MNF chuan a demin, tinawn tawh lo turin a chah a, Mizo ṭhalaite thinurna chawktho lo turin a hriattir bawk a ni.
“He thil thlen tirh khan, Home Minister Pu Lalchamliana, Kolasib bialtu Pu K.Lalrinliana Minister, Pu T.J.Lalnuntluanga, Forest Minister leh Serlui bialtu MLA Pu Lalrinsanga Ralte te pawhin a ṭul ang a hma an la nghal kha MNF chuan a chhuangin, lawmawm a ti takzet a. Bairabi NGO leh zirlai pawl lamte pawhin hma an la nghal bawk a, he hmuna duty Mizoram police-te chungah pawh MNF chu a lawm takzet bawk a ni.
“Mizoram sorkar kan hrawn tawh zingah MNF sorkar tluka huaisen, a hun taka silai hmet puak ngam an la awm lo. Ramri buai hi eng political party mahin thangṭhat lak nana hmang lo tur leh eng pawl pawhin mahni pawl hming tihṭhat nan hman tum lova, sawrkar hmalakna kal mek ngaichang a, hnam anga ṭangrual turin MNF chuan Zoram mipui a ngen nghal bawk a ni. Hnam dangte laka tangruallo anga lang thei tura Mizo leh Mizo, party leh party indemtawn nana hman fo pawh hi ching tawh lo ila, MNF chuan a duh takzet a ni,” tiin an tarlang.
