Vawiin ni 4. 10. 2022 zing dar 6:00 khan Ministry of Culture bul tuma Mizo Department, Mizoram University leh Ace Events and Rentals te buatsaih Azadi Ka Amrit Mahotsav lawmna (India Independence kum 75 -na) October ni 4 atanga 7 thleng awh tur Evolution Fest chu School Education Minister, Pu Lalchhandama Ralte chuan Vanapa Hall kawtah a hawng a.
He Evolution Fest hawnnaa khuallian Pu Lalchhandama Ralte chuan Azadi Ka Amrit Mahotsav hi India sawrkar hmalaknaa zalenna kum 75 leh a mipui, nunphung leh hlawhtlinna chanchin ropui tak lawmna leh hriatrengna a ni a. India ram Independence kum 75-na lawm tura Mizo Department, Mizoram University leh ACE Events Rental tang dunin, Ministry of Culture, Government of India bul tuma Evolution Fest neihna chang an lo hria chu fakawm a tih thu te, India Prime Minister zahawm tak chuan mi tinin taksa hrisel leh nunphung dik kan neih theihna tura infuihna Fit India Movement chu August 2019 khan a lo din a. He mi hnuaiah hian India mi zawng zawng te chu taksa hrisel tha nei tura taksa insawizawi that a tul zia te, ei leh in thleng pawha taksa tana tha lo reng reng ti lo tura zirtirna a ken tel vek thute sawi a. Khuallian chuan he huna lo kal thalaite chu kan ram nghakfak an nih avangin taksa hrisel tha tak an neih theih nan nitin darkar khat tal exercise la ngei ngei turin a sawm a. Tin, taksa tana tha lo, zuk leh hmuam, ruihtheih thil kan tih avanga natna kan tuar leh kum naupangte te ten nunna an chan tam tak thu te, thalai tam tak, kum naupang te te zingah thisen sang, zunthlum nei leh Stroke avanga nunna hlu tak chan sawi tur an awm ta fo mai te chu a pawiin, nunphung dik zawh hram hram a tul thu te, tul mang lova zan men rei te, sa thau leh ei tur hrisel lo lakah pawh kan fimkhur a tul thu a sawi bawk.
He Evolution Fest hawnna Cycle Rally hmanga neihah hian Mizoram Cycling Association atangin mi 100 vel zet an tel a. He festival ah hian Cycling bakah Seminar-te, Mizoram ngeia kan thil siam pho chhuahna Local Product Expo te, Mizo Literature hmasawn dan Live Panel Discussion te, zirlai tan Career Guidance leh Soft Skills Training te bakah Cultural Evening ropui taka buatsaih a ni dawn a ni. He Evolution Festival hi ni 7 October 2022 zan hian Multipurose Hall, Mizoram University ah Pu K. Vanlalvena MP (Rajya Sabha) chuan a khar dawn a ni.
