MPCC Elected Office Bearer-te Mizoram District hrang hrang tlawhchhuah Programme hman mekah Khawchhak Tlangdung Fan mek a ni a. Nimin khan Saitual District a Keifang Kawnah hun hman a ni a, vawiinah Zaingen Branch YMA hall, Khawzawlah hun hman a ni bawk.
He hunah hian Lalsawta, President, MPCC chhuan thu sawiin, “Khawzawl district leh Saitual District thar hi kan lawmpui takzet che u a. MNF-in a pek tum tawh a, a thuam famkim hna chu Congress Party-in kan tum ve thung ang,” a ti.
Lalsawta chuan, “Dinchhuah tuma tan la mekte puih hi a nuam kan ti a, kan tanpui zel dawn a ni. Chu chu kan Manifesto lian ber pawh a ni bawk. Kawng tinreng a eizawnna ngelnghet siam hi kan tum a ni a. Mizoten ram kan nei, mipui kan nei bawk, chumi enkawl tur Sorkar tha chu kan mamawh ber a ni. Kan rilru puthmang, kan ngaihtuah dan, kan ngaihhlut zawng hi kan thlak a ngai a, kan ram hi a siam that theih a ni tih hi kan pawm a ngai. Nakum 2023 kum tawpah kan inthlang dawn a. Kan chhiah tlingkhawm dik lo taka lo suasamtute, chutiang avanga lo hausa tate chuan mipui sum an eisak hmang khan min lei an tum dawn, kan vote lei an tum dawn. Heng mite hian i vote ringawt lei an tum a ni lo, nangmah kha lei che a tum a ni zawk. Mihring lei theih – Sal emaw, Nawhchizuar ang lekah an ngai che tihna a ni. Lei theih i ni lo a, Mizoram siamtha turin i duhna ngeiah vote i thlak thei, i rinawmna kha lo hralh suh ang che. Kan ram hi kan la siam thei, chumi tur chuan kum 2023 MLA General Election hi a pawimawh em em a ni. Kum 2023 election-ah hian ram siamthat i duh tak tak a ni tih kha i vote hmangin lo lantir ang che,” a ti.
“Congress kan sorkar a nih chuan thlai chin uarna hmun bik area kan siam ang a, chung thlai chingtute mamawh leh an mamawh intawmte chu Tang Puihna hmangin kan pui dawn a ni. Tanpuina hi nuai bi atanga mamawh intawm, kawng, electric, tuilak, etc siam nan vaibelchhe tel thlengin kan tanpui dawn. Sawiselna tur ringawt zawnga lo chang thinte chuan he ruahmanna hi lo sawisel rawh se, mahse hei hi kan ti dawn. He hnam hi a dingchhuak thei, min daltu chu keimahni tho hi kan ni. Mi thaten engmah an tih duh tlat loh chuan sual hian thatna hi a hneh thin. Mi thaten ram siamthatna hi kan vei a, theihtawp kan chhuah a ngai,” a ti bawk.
Lal Thanzara, Vice President, MPCC pawhin thu sawiin, “Kan ram dam lo mek hi a tidam theitu chu Congress Party hi kan ni. Tihdam rawngbawl hna min thawhpui turin Mizoram mipuite kan sawm a che u. Tunah hian tih palh sorkar kan hrawn mek a, sum leh pai an enkawl dante, dan leh hrai an enkawl dante a that loh zia kan hria. Kum 2023 inthlan lo awm turah hian tih palh sorkar kan neih tawh lohna turin nasa takin tan i la ang u. Pathian lam tang policy neih kan tum. Hmanni lawka Manifesto Number 1 kan tlangzarh a, Mizoram mipuiin min ngaihvenpui em em tih kan hria a, kan lawm takzet a ni. Keini chuan system dik leh tha zawka ram hruaina hna kalpui kan tum a, chu chu kan ngam bawk. Tawngkam thiam leh intiamkamna ringawt hi a ropui ber lo. Congress Party chuan hun rei tak kal tawh atang khan kan thutiam hi kan hlen zel a ni. Min lo enchhin ve teh u tiin mi thenkhat an inzuar mek. Mahse, an CM candidate ngei pawh hi Party hrang hrang leh bial engemawzatin kan lo enchhin tawh a, enchhin tlak a ni lo tih a takin kan hre tawh. CM ni thei tur Party leader pathumte hi en ula, eiru ngai lo, sum enkawl thiam, mi rinawm Pu Lalsawta aia thlan tur zawk reng reng an awm lo. Rorelna dik lo hnuaia kan awm mek hi siamthat kan duh a, kan ram dam lo tidam tur hian thawhpuiah Mizoram mipuite ka sawm a che u,” a ti.
MPCC Elected OB-te District tin tlawhchhuah programme-ah hian district 11 zinga district 8 fan zawh a ni tawh a. Tun tuma Khawchhak Tlangdung Fan Programme-ah hian Saitual, Khawzawl leh Champhai District fan leh a ni. Tin, Saitual-ah mi thar 249 lawmluh an ni a, Khawzawlah mi 134, a vaiin mi 383 lawmluh an ni a, heng mite hi MPCC President Lalsawta’n lawm takin Congress Party-ah a lawmlut a ni.
