Higher & Technical Education changtu Minister Dr. R. Lalthangliana’n vawiin khan Durtlanga Women’s Polytechnic Aizawl-in zirlai thar lawmluhna leh College Week kharna programme “Freshers’ Day cum Week Closing Function” an zirna in Hall-a an buatsaih chu khuallian niin a hmanpui.
Dr. R. Lalthangliana chuan Women’s Polytechnic chu zirna in institution danglam bik leh zirna in pawimawh tak a nih dante sawiin course pali an kalpui te chu Mizoram hmun dangah zirna a awm ve lova, hetah chauh hian a zir theih a ni, a ti a. An course kalpui te hi hna zawn nan leh thiamna bik neih skill neihna lam a nih avangin an zir zawh rualin hna an hmu awlsam bik nia a ngaih thu a sawi a, mahse chutih rualin Mizoramah chauh ni lo, phai lam hmun hrang hranga hnathawk turin an rilru leh an ngaihtuahna an inbuatsaih ngai niin a sawi.
Higher & Technical Education Minister chuan Women’s Polytechnic-in inzirtirna kawngah Sap tawng an hman uar chu tha a tih thu sawiin mahni tawng hi kan ngaihpawimawh rualin tunlai khawvelah a bik takin phai lam thawh dawnin Sap tawng thiam a pawimawh a, tawng kan thiam chuan tawng vanga ramri kham communication barrier hi kan paltlang thei a, hei hian nasa takin hnathawhna lamah puiin a tihawlsam phah thin a ni, a ti. Women’s Polytechnic atanga zirchhuak zirlai 1000 chuang an awm tawh thusawiin, a then te chu private sector lamah hna tha tak tak nei te an ni tawh a, skill based education hi a pawimawh chho zel dawn a chuvangin he zirna in hi pawimawh tak a ni a, a bik takin employment generate-na leh hna thawh tur kawng inkawhhmuhna lamah in thawhhlawk hle a ni, a ti.
Zirlai naupang te chu certificate nei tur chauha zir lovin thiamna skill tak tak nei turin an zirlai leh course te zir turin a fuih a. Tunlai khawvelah eizawnna kawng hrang hrang a tam tawh thusawiin Sawrkara dil ngai lovin hna leh kawng thar te hi private sector bakah mahnia eizawnna kawng self employment lamah a tam tawh a, mahse teirei peih leh tuarchhel nih a ngai a, chutiang rilru nei theih turah in inbuatsaih ka duh a ni tiin zirlai te a chah a ni.
Zirna in mamawh zirtirtuten a hnenah an thlen chu ziaka thehlut turin a hrilh a, a thei anga anga a lo en tur thu a hrilh bawk a ni.
Women’s Polytechnic hi kum 1998 a ding tanin Course pali – Modern Office Management & Practice (MOMP); Garment Technology (GT); Electronics & Telecommunications (ET) leh Beauty Culture & Cosmetology (BCC) ah te kum thum Diploma Course an nei mek a. Tunah hian zirlai naupang 227 leh zirtirtu 27 leh thawktu dang 31 an awm mek a ni. Nikum lamah zirlai chhuak te chu placement – Oberoi leh Taj bakah company danga pawh an hmu a ni.
