Aizawl, 10th March, 2022 : “Kum 2022-23 atana Mizoram sawrkarin sum hman dan tur a pharh chu Assembly Session vawi 8-na chuan a pawm ta a. Kan sawrkar hrawn mek hian Budget vawi thum a pharhnaah a flagship program-in hawilam a nei lo tih a chiang hle a ni,” tiin ZPM Party chuan thuchhuah a siam.
Thuchhuahah chuan, “Kan sawrkar hian kum 2022-23 a sum hman dan tur a pharhah hian hmasawnna ruhrel dinna tur hawi zawnga ruahmannaah mipui vantlang tana hmasawnna leh nawmsakna hawi zawnga sum hman dan turin kum tin hniam lam a pan zel a. Chutiang bawkin ei leh bara hmasawnna tur lam (economic sector) hmalakna tur sawi viau mah se an sawrkar tirha sum hman pumpui 31% lai ni kha kuminah chuan 24% ah a tlahniam tawh a ni.
“Hmasawnna tura hmalak a tumna ber flagship program SEDP hi a takah chuan sum hman danah a lang chiang a. Hniam lam a pan zel avangin kum 2022-23 budget-ah hian mipui tan beisei tur a awm lo hi a lungchhiat thlak kan ti hle a ni.
“Session program mipuiin kan thlir thup laiin rorelna sang berah hawihhawmna leh dawhtheihna kan tlakchham zia, house decorum kenkawh kawngah Speaker-in hna a tlin loh zia a lang chiang hle in kan hria a. Kan aiawha thlanten House Record-a awm tlak lo thu an chhakchhuak fo mai te hi rorelna fel lo lanchhuahnaah kan ngai.
“Kan CM bakah ruling MLA thenkhatten Dan lo a thil kal leh siamthat ngai opposition MLA-ten an sawichhuah chu ‘Kalphung pangngai’-ah an pawm thu leh CM-in “Kum 60 chuang kan kal tawh dan hi kan thlak dawn lo” a tih phei chu mipuiten roreltu kan thlak a hun tawh zia a tilang chiang hleah kan ngai a ni. He sawrkar hian insiamthat tumna emaw sum hman danah hmasawnna hawi zawnga ngaihtuahna an sen loh zia a tilang chiang hle bawk.
“Dan leh hrai zawm kawngah roreltute an hlawhcham chiang hle a. Budget pharhnaah pawh Dan bu, Mizoram Fiscal Responsibilities and Budget Management Act 2006-in a phut anga kan sum hmuh dan leh hmanna te, indaihlohna leh kan leiba te chu kan state sum dehchhuah pumpui belhkhawm (GSDP) atanga za zela (percentage) a tam dan chu Medium Term Fiscal Policy Statement-ah a tarlang tur a nih laiin a sum zat leh a tam leh tlem lam amount-a a sawi chu mipui bum tumnaah kan ngai a. Danin a phut ang leh mipuiin thudik an hriatthiam theih tura sawi thin tawh turin kan ngen a ni,” tiin an tarlang bawk.
