Vawiin October ni 10, 2022 (Thawhtanni) hian Mizo Hnam Run chhung inkhawm neih a ni a. Hun hnihnaah K.Vanlalvena Hon’ble MP (Rajya Sabha) chuan kan term chhungin hripuiin kum 2 chuang zet min nuai a, chuvangin sorkar hmaa kan intiam ang kha engemaw zat tih theih lohin a awm a, hripui len vanga kan intiamna kan tih theih rih lohah mipui hriatthiamna kan dil a ni. MNF hian nakum kum tawp inthlanah sorkar leh ngei kan tum a, party worker zawng zawngte kan thiam tawk leh theih tawk ang theuhin hma kan la ang a, Pathian leh mipui zarah kan sorkar leh ngei dawn a ni, a ti.
K.Vanlalvena, NCC MNF general headquarters chuan, “Sorkar hmaa ram hmangaih hlur a, sokar hnua chhung leh khat ringawt hmangaih hi Pathian leh mipui duh loh zawng a ni a, MNF chuan kan ti ve thiang lo,” a ti a. Kum 2018-a MNF sorkar chhan sawiin, “Congress sorkar zu zawrh kha mipui leh kohhranin an ning hle a, kan sorkar chuan kan titawp ang kan ti a, kan sorkar a, kan titawp nghal. SEDP kha kuthnathawktute dawmkan nan kan aupui nasa hle bawk a, hripui vangin kan duh angin kan kalpui mai thei lo a, tunah hian a tahtawlin kan kal pui mek zel a ni. Kum 2018-a hmun tina kan MLA candidate-te kha a mimal ang theuh pawhin an tha em em vek a. Congress sorkar kha Mizo Nationalism-ah ke a pen meuh lo a, hnam humhalhna kawngah hma a la meuh lo. Congress leader Pu Hawla leh kan leader Pu Zoramthanga kha mipuiin an khaikhin a, Pu Zoramthanga chu tawngtai reng mi, Pathian tih mi a ni tih mipuiin an hria. Congress Vice President meuh leh MLA huhang ngah tak inthlan dawnah an lolut a, Pu Robert Romawia Royte a lolut bawk a, khangte kha kan sorkar chhan pakhat a ni,” a ti bawk.
“Lalthutthlenga min dahtu Pathian rawn chung zelin kan level theuhah kal i la, kan sorkar leh ngei ang. Pathian duh dan lova thil kan tih chuan min hnuk hniam ang. Kan work order, supply order leh hna lakahte hian tawngtaina nen Pathian rawn zel i la, kan sorkar leh em em ang. Kan hna inpek danahte hian a petuin chanvo neih ve phet lo tum hi Pathian duh loh zawng a ni bawk. Pathian leh kan ram tan titu kan nih angin engkimah Pathian dah lal ber zel ang u. ZPM hruaitute hian an sorkar tur thu an puang dum dum a, an la sorkar miah lo. Sorkar leh kar loh chu puan vak vak aiin Pathian thu thu a ni zawk,” K.Vanlalvena chuan a ti bawk.
