Tukin October ni 12, 2022 zing khan Health Minister Dr.R.Lalthangliana chuan N.Vanlaiphai PHC a tlawh a, Dr.Lalzawmi MO leh staff dangten an lo dawngsawng a. An mamawh an lo thlen zing a X-ray khawl chu CSR atanga hmuh velah ngaihtuahsak an nih tur thu a hrilh a. Ayush Doctor an mamawh pawh a tul ang tihfel anih hnuah a khaw mi ngei duhsak an nih tur thu te, Ambulance pawh a theih anga ranga tihsak an nih tur thute a sawi bawk. PHC atanga CHC-a upgrade an dil chu covid avangin post thar siam theih a ni lo a, covid chu awm lo se, upgrade sak an nih daih tawh tur thu a hrilh. Kumin chhunga free clinic neih an dil chu tihsak an nih tur thu a sawi bawk.
Health Minister Dr.R.Lalthangliana hian a bial khaw hrang hrang Cherhlun, Ngharchhip leh New Ngharchhip-te tlawh nghalin khawtlang hruaitute nen inkawmhona an nei a. Cherhlun CRC Building-ah khawtlang hruaitute hmaah thu a sawi a, a bial chhungah khaw lian deuh pan thei lo khaw te zawk tan Health Clinic 7 an neih thar mek thu a sawiin, Mizoramah Hospital thar te deuh, Health Clinic khaw 237-ah a awm thar mek tur thu a sawi bawk. Health Clinic hian SEDP Health Worker pawh a khaw mi ngei lak an tur bakah Dawhkan leh Steel Almira a kentel tur thu a sawi bawk.
Dr.Thangtea chuan, “Kum 2018 kum tawpah kan sorkar a, kum khat tha kan sorkar hman chauh a, kum 2020 January atanga kumin kum chanve thleng khan covid-in min tibuai a. Kan sorkar tirh a Health department-ah post ruak 700 chuang lak tura kan ruahman fel, cheng vbc 50 ruahman sa pawh kan chhunzawm thei ta lo a. Pension ai te, thi ai post ruak hnawhkhahte pawh kan ti thei ta mai lo a. Nakum financial thar atang chuan a tih theih angem tih Central atanga kan hmuh dan a zirin a la hriat rih loh a ni. SEDP pawh covid vangin kan tum lawk sa angin kan kalpui thei rih lo a, Pathian leh mipui zarah nakum inthlanah kan sorkar leh ngei ang a, thil tam tak tih tur hi a tam hle dawn a, nasa takin thil thar kan hmu dawn a ni,” a ti.
Health minister hian New Ngharchhipah Health Clinic a hawng nghal bawk a ni. MNF Adviser, Dr.R.Lalthangliana hian Cherhlun veng hrang hrang atangin voter 14 MNF-ah a lawmlut nghal a. Zan lamah Thingsaiah hun a hmang nghal bawk a ni.
