Bairabi – Sairang inkara rel kawng siam mek chu vawiin khan Mizoram Journalists’ Association (MJA) member-te’n an president C Lalrambuatsaiha hoin an tlawh a, hnathawktute chuan 80% hna an thawh zawh tawh thu leh December 2023 ah prime minister Narendra Modi hawntir an tum thu an lo hrilh. MJA member-te hian Mualkhang, Sairang leh Sihhmuia hnathawh mekte an tlawh a ni.
MJA member-te lo dawngsawngtu North Eastern Frontier Railways consultant Hrangtawna, IRTS (Rtd) chuan hna ngawrh taka thawh a nih thu sawiin, “Harsatna kan tawh ber chu ruahtui tla rei lutuk hi a ni a, hna a thawh chak theih loh phah. Tin, ban phunna tur hmun khata zangnadawmna an dawn hnuah pawh in neitute’n an in an chhuahsan lawk duh loa, ban phun lawk theih a ni lo. Tunah chuan ban hi phun tan a ni tawh,” a ti.
Bairabi-Sairang inkar rel kawng tur hi km. 51.38 a ni dawn a, hemi inkarah hian leidawh tenau 87 leh a lian 44 lai a awm a, leiver sei ber pawh tunnel number 1 Bairabi bul a mi niin km 1.300 vel laia sei a ni a. Rel kawng siam nan hian cheng vbc. 5,000 ruahman niin, December 2023 ah a lungphum phumtu prime minister Narendra Modi hawn tir tum a ni.
Leiverh awm tur 23 chu verh zawh vek a ni tawh a, lei dawh hna ngawrh taka thawh mek a ni. Lei ban tur hi hmun khatah phun mek a ni a, a bak chu phun zawh vek a ni tawh.
Bairabi-Sairang inkarah hian mihring phur rel chu darkar khatah km. 100-a chak thlenga tlantir a ni dawn a, bungraw phur chu darkar khatah km. 65 thlenga chaka tlantir theih a ni ang. Sairang atanga Bairabi inkar hi darkar 1 vela thleng thei tura ngaih a ni a, Sairang atanga Guwahati chu darkar 16 vela thlen theih tura chhut a ni. Hei hian station hrang hranga din hun chhung tur a huam tel.
