Aizawl, the 12th March 2022: Nimin chawhnu khan Er H.Lalzirliana, MLA, Vice Chairman, Road Infrastructure Development Board chuan a office-ah thalai hnazawng mek ten tangkai taka an chhawr turin ‘Mizo Competitive Year Review’ tih lehkhabu chu a tlangzarh.
Er H.Lalzirliana, MLA leh India ram Petroleum Company lian tak, Hindustan Petroleum Corporation Ltd(HPCL) a Vice Chairman hlui chuan Mizo thalaite India ram khawi hmunah pawh thawk thei turin an thiam tawk nia a hriat thu a sawi a. Mizoram chhung ringawta hnathawh tum lova, chona lian zawk hmachhawna state pawn lama hna thawh uar turin thalaite a ngen a ni.
Mizo Competitive Year Review hi Competitive Exam hrang hrang inbuatsaih mekte tan, Pu RK Hnuna, Director ZoCareer Solutions in a buatsaih a ni a. He lehkhabu ah hian Kum 2021 chhunga Mizoram chhung bika Current Affairs pawimawh zawng zawngte, National News pawimawh leh International News pawimawh bakah Sorkar Scheme pawimawh hrang hrang leh GK Note pawimawh tak tak te dahkhawm a ni. Mizoram chhung bik information leh news atan hian Mizorama Chanchinbu lar deuh te leh DIPR website te hman tangkai a ni.
