Vawiin ni 15.10.2022 (Inrinni) hian Kanan Multipurpose Hall-ah Kanan Branch YMA Rising Day lawmna hun hman a ni. Zirlai hlawhtlingte chawimawina, Golden Jubilee logo tlangzarhna leh Golden Jubilee khuhhawnna hun hman a ni a. He hun hi Lalruatkima, Kanan YMA Patron, bialtu MLA ni bawk chuan a hmanpui.
Lalruatkima chuan, hun khirh leh harsa an tawk ṭhin chunga Pathian hruainaa Golden Jubilee hmang mai tura inbuatsaihna kalpui thei a ni chu lawmawm a tih thu a sawi a; “Hruaitu hmasate thawhrim rah kan hmu,” a ti.
Lalruatkima chuan zirlaite fuihna thusawiin, “Pathian ṭih hi a pawimawh ber a, engkim chunga thuneitu hi kan zah tur a ni a, kan ṭih tur a ni. Chu chu kan hnukchah thlengin kan vawng reng tur a ni,” a ti a. “Kan nu leh pate hmangaiha, chawimawi hi kan tih ngei tur a ni a. Eng dinhmunah pawh ding ila nu leh pate kan zah tur a ni a, kan lei Pathian an ni. In hlawhtlin ni a lo la thleng ang, vawiin kan dinhmuna min hlangkaitu an nih i hrereng ang u,” a ti.
Lalruatkima chuan, “Hun inzat vek Pathianin min pe a, daih zai zawkin hun kan hmang thiam tur a ni. ‘Time is money’ tih a nih angin kan hun neihte hmang ṭhangkai ila, hriatna tihpun nan te leh midangte tan malsawmna nih tum tur a ni,” a ti.
Bialtu MLA chuan, “Kan dam khawchhuahna turin taima takin kan beih a ngai. Mimal, khawtlang, leh ram leh hnam dinchhuah nan kan taimak lehzual a ngai a ni. Taimakna hian hlawhtlinna a sithlu a ni,” a ti a. “Engkim thawk turin lehkhathiam a pawimawh tawh a ni. Ranvulh, carpentary, infiamna leh loneimi ni tur pawhin lehkha thiam a pawimawh tawh a ni. Lehkhathiam chuan eizawnna kawng hrang hrang an zawhnaah taima leh rinawm taka an thawh chuan an lehkhathiamna an hmang ṭangkai a, dinchhuah nan an hmang ṭhin,” tiin zirlaite lehkhathiam turin a fuih bawk.
He hun hi Lalramnghaka Pautu, Kanan YMA Vice President-in a kaihruai a ni.
Kanan Branch YMA-ah hian member 2326 an awm mek a ni.
