Chief Minister-in Mizoram Police Sports Meet vawi 20 na a hawng

Aizawl, 17th, Oct. 2022 : Chief Minister Zoramthanga chuan vawiin khan Mizoram Police Sports Meet vawi 20 na chu Rajiv Gandhi Stadium, Mualpui ah khuallian niin a hawng. He sports meet hi vawiin October ni 17 atanga ni 21, 2022 thleng hman a ni ang.
Chief Minister Zoramthanga chuan Mizoram police-te chu sports ah hmahruaitu leh min tihhmuhtu, tun thleng pawh a discipline tam taka champion nihna la hauh thintu an nih zia a sawi a. Mizoram mipui leh a bik takin mipui mithmuha sports an lo chawisan thin tawh angin, entawn tlak taka an kal zel a beisei thu a sawi. Chief Minister chuan sports chu industry pawimawh a nih thu a sawi a. Taksa leh rilru hriselna atan a that bakah eizawnna tha, sum tam tak lakluh theihna a nih avangin thalaite tan pawimawh a, hnam changkang zawkte pawhin an ngaihpawimawh thu a sawi a. Police-te chu thalaite entawn tlak ni turin kawng engkimah theihtawp an chhuah a beisei thu sawiin Mizoram Police Sports Meet chu hlawhtling taka an hman a duhsak thu a sawi a ni.
DGP Devesh Chandra Srivastava pawhin sports meet hawnna ah hian thu sawiin, tum dang aiin inelna event tam zawk dah a nih thu a sawi a. Ram pum huap police inelna nen a inzul tura discipline thlan a nih thu leh, police-te mai bakah officer nupuite tan pawha tel theihna tur thlenga inelna siam a nih thu a sawi a. Mizoram Police in an hna an thawh dan hrang hrang leh an hlawhtlinna te tarlangin, thawktu indaihloh avanga harsatna awm te a sawi tel bawk a ni.
Kum 1987 atang khan rokhawlhna a awm a nih loh chuan kum tin deuh thaw Mizoram Police Sports Meet hi buatsaih thin a ni a, kum 2019 thleng khan vawi 19 he Meet hi buatsaih tawh a ni a. Hemi hnu hian Covid-19 hripui leng avangin buatsaih theih a ni lo a, boruak a that hnuah tun hi Mizoram Police Sports Meet neih vawi 20-na a lo ni ta a ni.
Tun tum Police Sports Meet-ah hian Mizoram Police pumpui chu Contingent 11-ah then hran a ni a, chung contingent 11 atanga infiammi 1114 kalkhawm te chu intihsiakna (event) 18 ah an inel dawn a ni. Heng intihsiaknate hi Aizawl leh a chhehvel venue 12-ah khelh a ni ang a. Athletics, Football, Taekwondo, Wrestling, Judo, Boxing, Basketball, Table Tennis, Chess, Lawn Tennis, Chess, Carrom, Chinese Checker, Shooting (Indoor), Badminton, Volleyball, Tug-of-War leh Strongest Man ah te an inel dawn a ni.
District Council hunlai atang tawhin Mizoram Police hian sport lamah mellung pawimawh tak tak a lo phun tawh thin a, kum 1971 atang khan Assam Rifles Football team leh Mizoram Police Football Team-te chuan Independence Day Football Exhibition Match an lo khel tawh a, kum 1974-a 1st Battalion MAP din a nih atang phei kha chuan Mizoram Police chuan mumal zawkin Sport lamah tan a la a, ram pum huap inelna hmasa ber Mizoram Olympiad 1977-a Block level intihsiaknaah sawm a nih angin Mizoram Police chu a chhuak ve a, Gold Medal 3 lai an la a ni. Mizoram Police hi vawiin thlengin Sport-ah hmahruaitu leh infiammite hna pekna kawng sialtu pawimawh tak a ni a, a bikin major Game pathum – Football, Hockey, Volleyball leh Contact Sports leh Badminton-ah te phei chuan hlawhtlinna vawi duailo an lo chang tawh a. Tunhnaiah pawh Football-ah State aiawha PRhlawhtlinna tam tak changtute an awm a, Kum 2014-a Mizoram State Football Team te Santosh Trophy-a an champion tum khan, Mizoram Police footballer 5 leh physio 1 an tel ve a ni. Vawiin thlengin top flight football (Mizoram Premier League) an la khel a, kumin, 2022 Independence Day Celebration Football Tournament-ah khan Champion dinhmun an luah bawk.