Vawiin hian AR Lammualah kar khat awh tur Zoram Medical College Week Exilcir-2022 chu Sports Minister Robert Romawia Royte-in a hawng.
He Week hawnna hun hi ZMC Director Dr Zohmingthanga’n a kaihruai a, Zirlaite chu House 4-a inthenin March Pass an nei a, TNT Pipe Band-in an thiamthil ropui takin an entir bawk.
ZMC Exilcir- 2022 hawnna thu sawiin Sports Minister Pu Robert Romawia Royte chuan ZMC chu Covid-19 hripui len tirh atanga a tawp thlenga huaisen taka nun tam tak chhan nana tang ngam a ni a, zahna chibai bukin a chhuan thu a sawi a, anni hi kan Covid Hero dik takte an ni a ti a.
ZMC hi Mizovin kan medical college neih chhun a nih avangin sorkarin a thanlen zel dan tur a ngaihtuah hle tih a sawi a. Mizoram sorkar chuan ZMC chu zirlaite tana a that ber dan turte, thawktute tana a that ber dan turte, mipui tana a that ber dan tur zel chauh a duh a, chutiang atan chuan hma a la zel ang. Social media leh titi awmkhauh leng vel avanga chi-ai chi a ni lo a ti.
Sports Minister chuan Mizoram hi India rama state fit ber, mipuite pawh India mipui zinga fit ber ni tura tanlain Mizoram sorkar chuan Fit Mizoram Movement a kalpui a, Covid hrileng karah pawh hmasawnna duhawm tak tak kan hmu zel a ni tiin Sports chu zirna peng pawimawh a ni tawh a. Uar deuh deuh a tul a, hmasawn tur chuan mipui hrisel leh fit kan nih a tul a, National Education Policy 2020 duh angin College leh Zirna In te pawhin sports an uar a ngai tawh a ni a ti.
ZMC-ah hian MBBS zirlai 395 an awm a, zirtirtu 90 leh thawktu dang 417 an awm a ni.
