Sports Minister-in Nagaland-ah Naga zirlai khawmpui lian a hawng

Sports Minister Robert Romawia Royte chuan vawiin khan ni 5 awh tur All Nagaland College Students Union (ANCSU) Khawmpui Lian chu a hawng. He ANCSU Inkhawmpui hi Dimapur khawpuia Sakus Mission College ah neih niin Nagaland hmun hrang hrang atanga College 32 telna a ni a. College zirlai 1500 chuangin sports leh cultural items hrang hrangah inelna an nei dawn a ni.
College Hall-a Inkhawmpui hawnna inkhawmah thusawiin, Sports Minister Robert Romawia Royte chuan kum 2010-2017 thlenga Nagaland sorkar leh NECS thawhdunna avanga NECS DPR hrang hrang siamte hmanga state budget pawn atanga sum tam tak hailuh a ni leh sorkarin duh taka NECS a rawih avangin lawmthu a sawi a. Nachang hriatna hmangin sorkar pawhin hlawhtlinna a chang thei tih tichiangtu a ni a ti.
Sports Minister chuan Nagate chu Tribal dangte aia hnam politics a harhchhuak hmasa an ni tiin British-in India a awplai kum 1929 daih tawh khan Naga Club chuan Simon Commission hnenah British sorkarin India a chhuahsan ruala Nagate chuan mahnia ro inrel ve nghal an duh tih Memorandum puitling tak an lo thehlut daih tawh a ni a ti a. India sorkar pawhin tihtak zeta rilru pea Naga mipui pawmpui thlap Inremna an neih theih ngei chu a duhsakpui thu a sawi bawk a ni.
Sports Minister chuan Nagaland-in kum 30 hnua Under-17 Subroto Cup-a an champion chu a lawmpui tih sawiin, hei hian Nagate theihna a pholang a, football leh sports discipline dangah pawh duailo thin Nagaland in kawng thar a zawh tanna tur a nih a rinthu a sawi bawk. Minister chuan ANCSU leh NSF ten sports competition lian an buatsaih thin chu fakawm tiin National Education Policy 2020 angin zirna in zawng zawng pawhin sports an kalpui vek a tul chho mek a, he education policy document-ah ngei hian ‘sports’ tih thumal hi vawi 30 lai a inziak a. Sorkar leh zirna in enkawltuten sports an namnul thiang tawh lo tih sawiin sports chu co-curricular education a ni tawh lova, education a ni tawh a ni a ti.
Sports hmasawnna tura Mizoram sorkar hmalakna thenkhat sawiin kum 2019 atanga Mizoramin sports policy mumal tak a neih tawh thu leh chumi zulzui chuan Mizoram sorkarin sports chu industry nihna a pek tawh thute, chumi avanga sports-ah hmasawnna tam tak a thlen mek thute a sawi a. Mizoram sorkarin term kallai kum 5 chhunga Football Phullem Field thar 30 siamzo hman tura tan an lak thute leh sports hmasawnna ruhrel dang tam tak an dinthar thu a sawi. Aizawl FC chungchang sawitel tura an ngen angin Robert Romawia chuan Naga zinga AFC Licence nei hmasa ber Coach William Koso chu Aizawl FC atangin anih thu leh Naga zinga I-League Player hmasa ber Thopi pawh Aizawl FC atangin anih thu a sawi a. Arunachal Pradesh leh Tripura atanga I-League khel hmasaber tepawh Aizawl FC chhulchhuak an ni a ti.
Tourism Minister ni bawk Robert Romawia Royte chuan kalkhawmte chu Mizorama zin ve turin a sawm a ni.
Function ah hian Naga Students Federation President Kegwayn leh ANCSU President Toito D. Chishi ten thu an sawi bawk a. Naga zirlaite chuan Mizo Minister hi duhsakna thilpek tam tak an hlan a, Nagaland nasa taka a lo puih tawhnaah lawmthu an sawi bawk a ni.