Aizawl, the 19th Oct. 2022 : Ramhlun Indoor Stadium, Conference Hall-ah vawiin khan Aizawl N-II Block huaihawtin, Block Conference leh mithar lawmluhna hun hman a ni a. He hunah hian Zoramthanga, Chief Minister, MNF President ni bawk chu khuallian a ni a. K. Vanlalvena, M.P (RS) chuan khualzahawm niin a hmanpui bawk.
Khuallian, Zoramthanga chuan, “Pa ber feh haw tur chuan, chhungkaw mamawh kan zawh tawk tur dapin thahnemngai takin thlawhhma kan suartluan thin a. Pathian leh kan Ram tan ti a, mi sang tamtak thisena baptist tawh MNF hi kan kalsan thiang lo a ni,” a ti.
MNF President chuan, ZPM chungchang sawiin, “A hram atang chuan sakeibaknei emaw tih mai tur kha, sabengtung bawk a lo ni leh thin,” a ti. “Congress pawh Central leh state-a sawrkar kawp, zu chhiah la bawk chunga sum harsatna kan tawh nasat zia te kha mipuiin an la theihnghilh lo a. Tun dinhmunah Congress chu sawisel pawh a inthlahrunawm lek lek tawk zawk a ni,” a ti.
Zoramthanga chuan, “Inthlanpui lo awm leh turah, Pathianin bul a tanpui, MLA tha tak tak beih ngaihna pawh an hriatloh te avangin MNF kan sawrkar leh ngei dawn a ni,” a ti. “Hunkhirh tak hnuaiah, Cheng vaibelchhe tamtak kan hmuh tur ang kan hmu lo chung pawha nghei lo leh buai lutuk loa kan awm thei hi, Pathian tanpuina avanga sawrkar hmalakna chaktak vang a ni, a ti bawk. Pathianin kawng chanveah min kalsan dawnlo a. Rinawnawm takin i bei zel ang u,” tiin party mipui kalkhawmte a fuih bawk a ni.
Khualzahawm K. Vanlalvena M.P pawhin thu sawiin, “Tun sawrkarah rinlawkloh leh beisei lawk hauh loin, hrileng, ramri buai leh thenawm rambuai avang tein harsatna lian tak tak kan hmachhawn a. Chuvang chuan kan hotuten an intiam ang leh an sawi angin an awm theilo a ni, “a ti.
K. Vanlalvena chuan, “Kan pian ve hmain MNF chu mumal takin a lo kal tawh a, MNF movement vangin hnamdangin kawng hrang hranga min chimral na turah humhim kan ni a. Independent sual anih laiin, MNF support lam apiangin thuneihna an chang thin a. Hei hian a tarlan chian em em chu, MNF hi Pathianin rorel turin a hun teah a ruat thin. Ram leh Hnam rawngbawlna ngaihven vaklo leh awmhmuna sawisel tur zawng tam zawkte hi mi intodelh tawhte an ni tlangpui a. Keini MNF chuan mi harsa leh tanpui ngaite kan hre zel dawn a. Keima mimal hian mi hausa leh thiltitheite ka tlawn ngai dawnlo a, Min pui let theilo tur te pawh pui zelin, opposition kan nihlai angin midangte kan party a awm turin i sawm zel ang u, a ti bawk.
