Congress Thalai chuan thuchhuah vawiina an siamah, “Aizawl Municipal Corporation (AMC) in property tax rate thar vawi leh khata sang thuta a la thar hi Congress Thalai chuan tha kan ti lova, Covid 19 hripui avanga ram mipuite ei leh bar zawnna kawngah nunphung pangngaia kan la awm kim vek theih loh laia hetianga property tax a let 3/4 vel laia tihsan a ni hi tihhniam dan kawng zawng turin AMC MNF sorkar chu MPYCC chuan kan phut a ni,” an ti.
Vawiin chawhnu khan MPYCC hruaitu thenkhatte chu Aizawl Municipal Corporation office ah lengin Asst. Commissioner (IT) Property Tax changtu Vanlalruata chu property tax chungchang an zawtfiah a. Tunhnaia property tax rate thar avanga Aizawl khawpui chhung tin ten property tax sang tak pek an ngaih mek thu AMC hotute hnenah hian an thlen a. Vawi lehkhata tax sang thut lak hian mipui a nghawng nasat dawn avangin mipuite phurrit ziaawm zawnga hma la tur leh an tipung dawn a nih pawhin mipuite hnenah awareness tha zawk leh kimchang zawka kalpui turin an duhthu an thlen a ni.
Hetianga mipuite harsatna leh phurrit thlen zawnga sorkar in hma a la thin hi Congress Thalai Hqrs chuan pawi a ti hle a, a tulna apiangah mipuite thlavang hauhin ke a pen zel dawn a ni tih MPYCC chuan an sawi bawk.
