October, 14, 2022 Zirtawpni a Rulkual khua a electric line chhia siam tha tura hnatlang thawk zing a mi, Bungtlang South Line kal tir dan fel tawk loh avanga mi pathumin nunna an chan bakah midang pahnihin hliam an tawrhna chu vawiin khan Power & Electricity Department hotuten a hmun ah an enfiah.
Hetih lai hian Paithar Group Young Lai Association chuan vawiin vek khan thuchhuah siamin, vanduaina thlen chhan dik tak leh mipui tana him lo taka electric line kal tirtu chhui chianga, mawhphurtu chu a phu tawk hremna pe ngei tur leh electric line him zawk tura siam tha turin Mizoram sawrkar an phut.
Thuchhuahah chuan, “Dt. 14th October,2022 Zirtawpni, Rulkual khua a electric line chhia siam tha tura khawtlang huapa hnatlang thawk ten, Bungtlang South Sub-Division Line kal tir dan fel tawk loh avanga vanduaina rapthlak tak tawk a kan member duhawm tak tak pathum – Samuel C.Lalthianghlima(26) s/o C.Lalthawmmawia, Zoramdinpuia (23) s/o C.Lalhmunmawia leh C.Lalrinchhana (18) s/o Singthuama te chunga thihna hial lo thleng ta leh; kan member pahnih (2) Lalnghawrliana leh Lalrinenga ten hliam natak tuara damdawiin a enkawl hial ngaia an awm hi keini Young Lai Association Paithar Group chuan pawi kan tiin thihna tawk chhungkuate hi kan tawrhpui takzet a. Tin, hliam tuarte pawh Pathian zara an dam zel theih nan duhsakna sang ber kan hlan bawk a ni.
“Hetiang ang vanduaina a lo thlen palh kan hlauh avang hian YLA Paithar Group chuan Lawngtlai Power Sub – Division hnuai a Kawlchaw Feeder line (11 KV) leh Bungtlang South Power Sub-Division line (11 KV) inhnaih lutuka kaltir, hmun thenkhatah ban intawm leh hmun thenkhatah line inhnaih tak taka in cross te leh hrui hniam tak taka zam te chu thawktute leh mipuite tan a him lo hle a kan hriat avangin EE, P&E Dept. Lawngtlai Division hnenah kum 2018 atang khan vawi eng emaw zat thlen tawhin siam tha tur leh a hrana electric line hi kaltir turte, Bungtlang South Sub-Division Line siam hnathawktu (Contractor) hna chhe lutuk leh mipui tana himlo lutuk chungchangah Complaint pawh thehluh a lo ni tawh a. Amaherawhchu, he hna enkawltu ber Er.Lalchhanhima hetih hun laia EE, P&E Dept Lawngtlai chuan bengkhawn leh ngaihsak duh lovin, eng amah hmaa complaint-te siam thin lo turin min lo ti a. Bungtlang South Electric Line hman a nih chin ah hian kan hlauhthawn ang ngeiin chetsualna a thleng fo ta a. Mi pathumin hliam na tak tuar tawhin, mi pali ngawtin nunna an chan phah tawh a ni,” an ti.
“Heng vanduaina lo thlen chhan dik tak leh mipui tana him lo taka electric line kal tirtu hi chhui chianga, a mawhphurtu chu a phu tawk hremna pe ngei tur leh he electric line hi mipui tana him zawk tura siam tha ngei turin Mizoram sawrkar kan phut tlat a. Tin, vanduaina tawka, nunna chan chhungkuate leh hliam tuar te hnenah zangnadawmna pe ngei turin Mizoram sawrkar hi kan phut a ni,” an ti bawk.
