ZPM Hachhek North Block chuan thuchhuah siamin, “Hachhek tlangdung mipui ten kan eizawnna ber atana thangkhat lian chuang kan lo rinrawl leh innghahna, kuhva hi kumdang ang lo takin kumin hian vawiin thlengin kan hralh thei lo a, harsatna kan tawk nasa hle a ni. Kan kuhva rah hralh hun rinchhanin Bank loan te kan la a; in sak nan te, lirthei lei nan te leh kawng tinrenga chhungkaw hmalak nan ka hmang a ni. Chutianga kan innghahna ber kuhva rah chu kan hralh thei ta si lo va, loan pawh kan rul hleithei ta lo. Hei hian khawtlang sum virvel nasa takin a nghawng a, inhlawhchawp leh eichawp dapte thlengin tunah hian kan tuar mek a ni. Hemi kawngah hian, kan thawhrim rah liau liau, kan kuhva rah tharchhuah ngeite hi a ranglama kan hralh theihna tura chak taka hma min lak sak turin sawrkar kan phut a ni,” an ti.
Thuchhuahah chuan, “Kuhva hi kan pi leh pu te atanga kan eizawnna a ni tawh a, chang dang kan thei kan ni tawh lo. Hetianga kan innghahna ber kuhra hi tun dinhmuna kan hralh theih tak si lovah chuan, Hachhek tlangdung mipuite hmabak hi a thim hle a ni. He kan buaina bul ber pakhat, Mizoram chhunga kudam hrang hrang a ram dang kuhva awm reng pawh hi a rang thei ang berin a bo a bang awm lova tiral vat turin sawrkar kan phut bawk a ni.
“Hetih lai hian, kan kuhva rah kan hralh theihna tura theihtawp chhuahtu, Hachhek Bial Kuhva Chingtu Pawl (HKBCP) leh YMA Langkaih Group & Taitesena Group Joint Study Team te hmalakna hi kan thlawp tlat a ni,” tiin an tarlang.
