October ni 22, 2022 Inrinni khan MNF Diamond Jubilee kharna inkhawm, Vanapa Hall-ah hman a ni a. He hunah hian Zoramthanga, President, Tawnluia Sr Vice President leh Mizo Hnam pa Pu Laldenga (L) nupui Lalbiakdiki te’n thu an sawi a. Ram leh hnam tana ṭawngṭai rualna hun hman niin ram tana martar-te sunna hun hman a ni bawk a ni.
Zoramthanga chuan thusawiin, “Mizote hi Pathianin China ram aṭangin Burma ram kaltlangin min hruai thla a. Chhim, hmar leh khawthlang phaizawl ṭha tak tak thleng lo chiah siin he ramah hian min dah a. He rama Pathianin min dah chhan hi ka chhut fo ṭhin a. Kan chhehvela hnam upa leh sakhaw nghet tak tak nei sate’n min chimral loh nan he ram hi min pe a ni. Kan hnam nunna hi Lalpa’n helai hmunah hian a thukru a ni,” a ti.
MNF President chuan, “China aṭanga min hruai chhuak a, helai hmuna min dah hian chhan a nei a. He rama min dah chhan hi Pathianin a chanchinṭha hril tira min duh vang a ni,” a ti a. “Pathianin Mizote hmangaih taka min hruaina zawng zawng hi MNF ṭhat vang emaw, Congress ṭhat vang emaw a ni lo a. Vana a lawn dawna Isuan min chah, chanchin ṭha hril tura he hnam hi min duh vang a ni,” a ti.
Zoramthanga chuan, “MNF party hi Pu Laldenga hova din a nih tirh aṭangin Pathiana innghat tlat a ni a. Pathian leh kan ram tan, tiin a lungphum pawh phum a ni a, chu lungphum chu tun thlengin chawhnun zel a la ni,” a ti a. “Kan fel bik vang emaw, kan ṭhat bik vang emaw ni lovin Pathian leh kan ram tan tia kan din tlatna hi kan felnaah ruat sak kan ni,” a ti bawk.
MNF President chuan, “India leh khawvela chanchinṭha hril turin Pathianin min duh a, chu chu kan innghah tlatna tur a ni. MNF Party pawh Pathianin he ram tana chanchinṭha hril tura mi a buatsaihna tihlawhtling tura, kan beih ngar ngarna hi kum 60 min dam tirtu a ni. MNF nghehna, silaimu leh doral hrang hrang kara a damkhawchhuahna hi Pathian leh kan ram tan, tia kan din tlat vang a ni,” a ti.
Tawnluia Sr.Vice President pawhin thusawiin, “Silai bomb leh jet fighter hmanga beih a ni chunga Diamond jubilee kan lawm thei hi Pathian hnenah lawmthu kan sawi a. Pathian hruaina liau liaua he hun hi thleng kan ni a. He party hi Pathianin min hruai zel theih nan thil ṭha tiin a hnenah i inhlan thar ang u,” tiin MNF mipui kalkhawmte a chah a. Pu Laldenga, Mizo hnam pa chu zahna chibai a buk tih a sawi bawk.
MNF Diamond Jubilee hi October ni 22, 2021 khan hawnna hun hman a ni a. Kum khat chhung kawng hrang hranga a lawmna hun hman a nih hnuah vawiin hian kharna hun hman a ni ta a ni.
