ZORO Gen. Hqrs., Aizawl chuan vawiin khan United Nations Organization (UNO) day chu MZP conference hall, MZP Pisapui ah an hmang a. He hun hi Rohmingthanga Conley, Vice President in a kaihruai a, Rev. L. Rema, Adviser in hunserh hmangin, L. Ramdinliana Renthlei, General secretary ZORO chuan pawl hmalakna leh hmachhawp report a pe a. ZORO in UNO day a hman hi Mizoram a Political party hrang hrang in an hmanpui a ni.
L. Ramdinliana Renthlei, General secretary ZORO chuan, “ZORO chu khawvel hmun hrang hrang a awm Zofate kan insuihkhawm a, lungrual taka kan awm a, rorelna pakhat hnuaia kan awm theih nana hmalatu pawl a ni a. Zofaten kan chanvo dik tak kan chan theih nana UNO thlengin ke kan lo pen tawh a ni.” a ti a. L. Ramdinliana Renthlei, General secretary ZORO chuan, “Kum thar 2023 kum tirah Zofa Convention chu ZORO chuan a buatsaih dawn a, he huna hian khawvel hmun hrang hrang a Zofate sawmkhawm an ni dawn a. Chin Lushai Conference 1892-a Britsh Sorkar in keini Zofate thehdarh a awm te rorelna pakhat hnuaia kan awm khawm leh theih na tura, a lo ruahman, a tihpuitlin tak loh chu tihpuitling tura ngaihtuah ho turin Zofa Convention hi neih tum a ni.”a ti bawk.
UNO day a thusawitu ZORO President Pu R. Sangkawia chuan, “United Nations Organisation (UNO) hi 24th October 1945-ah khawvel ram hlawm lian ten an din a ni a, UNO ah hian permanent member 5 awmin tun dinhmun ah ram hrang hrang 193 an inthlunzawm mek a ni. UNO in a tum chu indona avanga hreawm taka awm te chhanchhuah te, khawvel ah remna leh muanna a awm theih nana hmalak te, ram rethei zawk te khaichhuah te, khawvel ram hrang hrang ten inlungrualna tha leh thawhhona tha kan neih theih nana hmalak te a ni tlangpui a. Zofate hi keimahni a in awp hrangin hlim takin kan cheng ho thin a, tuma awpna hnuaiah kan awm ngai lo a ni. Hemi kan neih letleh theih nana hma min laksak turin UNO ah ZORO chuan kan thlen thin a ni. ZORO chuan UN session ah palai te intir thin in, he huna hian Zo-hnam ziarang te pholan thin a ni a, kan hnam dinchhuahna tur thahnem tak sawi thin a ni. Hun lo la kal zel turah pawh ZORO chuan UN session ah palai kan la in tir zel dawn a, kan hnam kan dinchhuah theih nan hma kan la zel dawn a ni.”a ti.
UNO day hmanna huna hian Political Party hrang hrang in thusawina an nei a, Lalmuanthanga Fanai, Gen. Secretary MNF, V. Lalthazuala, Gen. Secretary MPCC, Vanlalruata, President MPC, Lallianzuala, Policy Drafting member ZPM leh R. Vanramchhuanga, Vice President BJP ten thu an sawi a. F. Ngurbiakvela, ZORO Vice President in lawmthu sawina neiin hun a khar a ni.
