Vawiin khan School Education Minister Pu Lalchhandama Ralte chuan Aizawl Chanmari YMA Hall-ah Mizoram Secondary School Teachers’ Association (MISSTA) General Conference vawi 22-na a hmanpui.
Minister chuan thu sawiin hrilen laia zirna kalpui naah kawng hrang hranga zirtirtute inpekna avangin lawmthu a sawi a. Zirtirtu hna chu hna zahawm anih avangin zirtirtute chu an zahawmna vawng nung zel turin a fuih a, inpekna thar nen thawk a, hun vawng dik tur te, incheina lamah felfai taka inchei thin turte, Pathian rawngbawlna a ni tih hriaa naupangte pawh an nungchang thlenga ngaihven turte, zirlai zingah ruihhlo ti tan an awm thin avangin ruihhlo laka invenna lam zirtirna pawh pe taima turin a chah a ni. Minister chuan zirtirtute chu aia upa zahna kawngah leh social media hman danah zirlaite kaihruai thin turin a chah bawk.
Minister chuan zirtirtute chu sorkar hnathawk an ni tih hriaa, conduct rules ngai pawimawh tur te, social media-ah pawh sorkar hnathawk te tih tur leh tih loh tur chin te thliar thiam turin a chah bawk.
MISSTA hian Pu Lalchhandama Ralte chu Secondary school tana a hnathawh avangin lawmthu sawina thuziak an hlan a. Kum 2018-2022 chhunga sorkarin High School tana a tihsak chi hrang hrang- Headmaster Recruitment rules siam thar te, Headmaster post 157 hnawh khah te, HS teacher post 157 hnawhkhah tur te, Hindi teacher 189 lak tawh te, SEDP teacher, LDC leh IV Grade lak te, hripui len laia HSLC examination kum 3 chhung offline a buatsaih theih avang te, minor repair leh Grant hrang hrang pek avang te, NABARD sum hmanga HS 71 sak that leh thawm that hna thawh te leh Samagra Shiksha hnathawk DA zaa 15 pek avanga an lawmna te an tarlang.
MISSTA General Conference-ah hian chawhnu lamah an pawl hmalakna tur kawng hrang hrang ngaihtuahin ro an rel a. An thurel zingah hian Govt. High School zirtirtu leh LDC post ruak hi sorkarin hnawhkhat rawh se tih te, Govt. High School Headmaster post ruak hi a hma thei ang bera hnawhkhat turin sorkarah thlen ni se tih te, DEO a kaisannaah SDEO leh High School Headmaster promotion ratio 75:25 chu 50:50 anih theih nan hma lak ni rawh se tih te a tel a. An Member thi 8 an sun a, an member pension 71 te thlahna hun an hmang bawk a ni.
