Inrinni tlai thim hma deuhva Tuirial Airfield peng bula tuialhthei phur truck chesual a kangmei chhuakah mi 4 an thi a, mi 17 an hliam.
Tarlan tawh angin, Tank Lorry phur chetsualna avanga Petrol bua a kangmei chhuak a nunna chante hi Rohlira (kum 74) Tuirial, Sangremzovi (kum 36) Tuirial, Lalnunhlima (kum 36) Thingsulthliah leh Dennis Lalthianghlima (kum 29) Ramthar, Lamherh te an ni a. Hliamte hi Durtlang Synod Hospital, Aizawl Civil Hospital, Thingsulthliah damdawiin leh Greenwood Hospital, Bawngkawn ah te dah an ni. Hliam zingah hian Sawimuanthanga, Sesawng chu Durtlang Hospital ICU-ah dah a ni a. Moses Lalrintluanga, Tuirial hi a taksa pum a kang ni a sawi a ni bawk, tunah hian Aizawl Civil Hospital-ah enkawl mek a ni. Thangrosiama, Tuirial Airfield hi za zela 80 atanga 90% kang ni a sawi niin Greenwood hospital-ah enkawl mek a ni. Anni bakah hian an taksa za zela 60 leh a chunglam kang mi 4 an awm bawk.
Inrinni zan khan Ruang 4 te hi Tuirial YMA Hall ah dah vek an ni a. Police leh Magistrate-te’n an enfel a. Nimin Pathianni khan post mortem examination tur a ruahman a ni a. Chumi tur chuan Civil Hospital-ah lakchhuk a ni a. Post Mortem examination hnu-ah an in lam theuh panpui an ni.
Thudawn danin Tuialhthei phur truck chesual tlu atanga mi engemawzatin petrol an lakchhuah laiin kangmei hi a chhuak ta niin an sawi a. Hetihlai hian meizial tan an awm a nih an rin thu an sawi bawk. Kangmei chhuakah hian taxi pakhat leh lirthei ke pahnih nei chi 3 a kang tel ni a thudawn a ni a. He kangmei thil thlen dan hi Police-in an chhui mek a ni.
Tuialhthei phur Tank Lorry chetsualna avanga kangmei chhuak ta chungchang ah hian vawiin hian All Mizoram Petroleum Dealers Association (AMPEDA) te chuan Aizawl Press Club chanchinbumite kawmin Press conference an nei dawn a ni.
