Kum 2023-ah Mizoram ah BJP sorkar turin hma kan la dawn : Kailash Choudhary

Union Minister of State for Agriculture and Farmers Welfare Kailash Choudhary chuan vawiin khan BJP State Office a tlawh a, Party mite hma ah thu sawi a, State President Chamber ah State President leh OB thenkhat te nen inkawmna hun tawi an nei bawk a ni.
Kailash Choudhary Union Minister chuan, “Vawiina Mizorama ka lo kal chhan chu NE States te tan hmasawnna chanchintha au chhuak turin a ni a, NE States-a hmasawnna a awm loh chuan India ram hmel lan dan a kim lo a ni. Prime Minister Pu Narendra Modi hian NE States a ngaih pawimawh em avangin Union Minister te chu NE States-a hmasawnna a lo thlenna tur leh Party Worker-te tih chakna kawnga hmalak pui a, Mizorama mirethei te’n PM Scheme kaltlanga Central Sorkar atanga malsawmna an dawn theih nana lo kal ka ni,” a ti.
Kailash chuan, “BJP Party ah hian Mizoram mipui te’n rinna an neih theihna turin Mizoram mipui tan theih tawp in chhuah zel a ngai a, Mizoram ah Sorkarna la siam lo mah ula, Mizoram mipui te’n an chanvo an chan theihna tura theihtawp chhuaha hmal a zel turin ka fuih che u a ni. Tun hunah hian BJP Sorkarna hnuaia hmasawnna hrang hrangte Mizoram mipui te’n a taka kan chhawr theihna turin Mizoram ah BJP Sorkar kan neih ve a ngai a, Mizo mipui te’n BJP nihna an hriatchian a, mipui rawngbawltu kan ni tih an hriat a ngai a ni. Mizoram ah BJP Sorkarna a lo awm hunah chuan State dang te hmasawnna kan hmuh ang hi kan nei ve thei dawn a, chumi ti tur chuan Mizoram mipui te pawh BJP hnathawh leh hmalakna te zirchianga min thawhpui theuh turin ka sawm che u a, PM Schemes hi Mizoram mipuiin an hriatfiah a, a dawng tur dik tak te’n an dawn theih nan BJP Member te chuan PM Schemes te chu mipui hnena hrilhfiah kawngah nasa leh zuala hma la theuh turin ka ngen che u a ni. PM Schemes kaltlanga mirethei te’n an chanvo an chan ngei theihna turin keini BJP te hian theihtawp chhuaha mipui kan zirtira kan hrilhfiah a ngai a ni,” a ti bawk.
Union MoS Agriculture leh Farmers Welfare changtu chuan, “BJP Mizoram State President Pu Vanlalhmuaka kaihhruaina hnuaiah theihtawp chhuahin hma la ula, Kum 2023 ah chuan Mizoram ah BJP Sorkar a pian theihna turin leh Mizoram in Central Malsawmna a taka an dawn theih nan MLA General Election ah BJP Sorkar kan hmuh ka beisei a, BJP Member te’n thei tawp chhuahin hma la zel ang u. Tin, BJP Mizoram Member te hei hi ka chah duh che u a, PM Schemes chungchangah emaw, thil dangah pawh harsatna innei a nih phawt chuan BJP Member te chu chhungkua kan nih avangin, eng hunah pawh biak theih in ka awm renga, inharsatna te sutkian a nih theih nan theihtawp chhuahin ka lo pui dawn che u a ni,” a ti bawk.