Mizoram in India ram pawna thawnchhuah tur sector hrang hrang a neihte sawi

Thawhtanni tlai khan Parliamentary Standing Committee on Commerce chuan an Chairman Dr. Abhishek Manu Singhvi hovin Parliament House Committee Roomah meeting an nei a. Member atana ruat thar K.Vanlalvena, Member of Parliament (RS) pawh he meeting ah hian a tel a ni.
Meeting ah hian thupui pahnih – Foreign Trade leh State Trading chungchangte sawiho a ni a. K.Vanlalvena pawhin thu sawiin, Mizoram in India ram pawna thawnchhuah tur sector hrang hrangah kan neih thu leh a bik takin Agriculture, Horticulture, Forest, Sericulture leh cane and bamboo product bakah handloom and handicraft product thahnem tham tak kan neih thu a sawi chhuak a. Thenawm ram Bangladesh leh Mizoram inkalpawhna kum 75 lai kharsak kan nih tawh avanga sumdawnna in a tawrhnate bakah Myanmar ram buaina avanga sumdawnna lama harsatna Mizoramin a tawh thu te sawi langin, Mizoram khawthlang lam ramri a awm Kawrpuichhuah hmuna Indo-Bangla Trade Centre peih fel thuai thuai chu Mizoram economy atana a pawimawh thu te a sawi chhuak bawk.
K.Vanlalvena chuan tun hnaiah UAE Embassy ah a kal thu leh Mizoram thlai thar chi hrang hrangte UAE ah thawn chhuah dan tur UAE Ambassador a sawipui thu meeting memberte hriatah a sawi chhuak bawk a. Mizoram atanga Arabia ramahte bungrua kan thawnchhuah theih nan bungraw phur Rêl service regular tak leh bungraw phur thlawhna service Mizoramin kan mamawh thute a thlen bawk a ni.