Prime Minister Healthcare Scheme (AB-PMJAY) chu MNF sawrkarin a ngaihsak loh avangin a hre lo an tam a, inziaklut an tlem tih BJP chuan sawiin, mi harsatna ngaihsak loah a puh.
BJP Mizoram thupuangtu Lalremsangi Fanai sawi danin, MNF sawrkarin Mizoram State Healthcare a kalpuiah damlote leh hospital-te hnena inenkawlna senso a bat tam dan chu mitin hriat vek a ni a, 2022- 2023 a Mizoram State Healcare-a chhungkua inziaklut 39505 thawhkhawm pawh Rs.7,12,37,000 a ni a; inziaklut zinga sing khat pawh an damlo tling loang tih tur a nih laiin, heti zat sum tlingkhawm hi khawnge sawrkar hian a luanral tir, tih chu zawhna a ni tih a sawi.
“Mipui leiba tipung tura loan hmanga health care enkawl tum pawh hi mipui zahlohna a ni a. Contract leh thildangah sum harsat sawi silo, Mizoram State Health Care kalpui ve chungchangah chief minister emaw Health minister-in phatmawina zawn reng hi a zahthlak a ni,” a ti. Khawvela health care scheme lian ber AB-PMJAY (Ayushman Bharat-Pradhan Mantri-Jan Arogya Yojana/ Prime Minister Healthcare Scheme kalpui a ni hlauh chu sawrkar laipui chungah lawmthu sawi mawlh mawlh chu kan tih tur a ni tih state BJP thupuangtu hian a sawi.
PM Healthcare Scheme hnuaiah Mizoram chhungkua 226147 atangin AB-PMJAY Scheme-ah chhungkua 194859 kan inziaklut thei a, chhungkaw tam zawk ziahluh loh leh inziah luh nachang hre lo kan la tam hle tih sawiin, “Inziaklut theiah hian kum 2018 a RSBY (Rashtriya Swasthya Bima Yojana) card nei an tel a. Tun dinhmunah inziaklut thei chanve pawh kan la inziaklut lo tih a lang. PM Healthcare Scheme chhawr kan tlem chhan chu state sawrkarin mi harsate a ngaihsak lo tih a lang,” a ti.
BJP Mizoram-in central schemes leh programme hrang hrangte an zir bakah Union minister lo zinten mipui chhawr theih tur an hrilhfiah zel laiin, MNF sawrkar chuan miretheite chanvo hmuhtheihna tur hlamchhiahin, mi hausate nena hlawkna insiam tawnna sum, luchhipa sam inphiarzawmna construction works-ah an tlulut zo a, hei hi ram leh sakhua tluksanna politics hrichhia diktak a ni tih a sawi a ni. “Central schemes & programme chhawrtu tur mipui hnen thleng turin beihpui thlak kan puang a. PM Healthcare Scheme-a cheng nuai 5 thleng chhungkaw tin tana a taka sum dahsa vek a awm tih pawh kan puang nghal a. Hemi dawng turin inziahluhna man emaw hospital a inenkawlna bill chawi hran ngailo in sawrkar laipuiin a chawisak vek a. Natna khirh bik enkawlna phei chu special lehzualin tanpuina scheme a la awm cheu,” Lalremsangi Fanai hian a ti a. AB-PMJAY hi sawrkar damdawi in bakah Aizawl leh district danga private damdawi in pasarihin an zawm tawh a, cashless vek niin sawrkarin a bill a buaipui sak vek tih a sawi a ni.
