Pangpar hi eizawnna tlak a tling : Dr. Elizabeth Saipari

District Horticulture Office, Lunglei District buatsaihin vawiin khan Convention Centre tualzawl, Lungleiah ni 2 – 4 November, 2022 chhung awh tur Flower Show 2022 hawnna hun hman a ni. Dr. Elizabeth Saipari, MHS, Director, Horticulture Department chuan khuallian niin a hawng.
Flower Show hawnna inkhawm hi Lalrinsanga, MHS, DHO, Lunglei chuan kaihruaiin khuallian Dr. Elizabeth Saipari chuan, Horticulture Department, Lunglei in Flower Show an buatsaih avangin lawmthu a sawi a, Flower Show buatsaih tur hian Department chauh hian hma ala thei lova, pangpar chingtute nena thawhhona neih a ngai a ni a ti. Kumin ah ruahtui a tam avangin pangpar thenkhat a tha lo chung pawhin hetiang zat pangpar pho chhuah ani thei hi ropui a ti a, pangpar hi Horticulture Department thlai zinga pawimawh tak ani tih sawiin, kum 1995 atang khan pangpar chingtute tan pawl dintir a ni a, hei hian nasa takin hma a sawn tir a ni. Mizoram hmun hrang hrangah pangpar a tam tawh hle a, hei hian khawchhung faina a keng tel a, Horticulture Department nih a ti nuam hle a ni a ti.
Dr. Elizabeth Saipari chuan, Pangpar hi eizawnna tling anih thu sawiin, thalai ten an ngainat zel a tha a, pa ho te pawhin pangpar chin lamah hma la se market ah awmzia a nei leh zual ang a ti. Kan tualto pangpar te hi tualchhung ah tih pun dan ngaihtuah a tul hle tih sawiin kan in bul leh varenda vel a chin ringawt pawh a tha a ni a ti. Lunglei pangpar chingtute pangpar a hrisel hle tih sawiin pangpar khawi thiam hi eizawnna tha tak a ni tawh a, zir duh an awm chuan training an buatsaih theih thu a sawi bawk. Anthurium chungchang sawiin Delhi ah thawn thin a nih thu leh an duhkhawp thawn theih lo avangin tan lak angai a ni a ti.
Flower Show ah hian mi 59 telin item 101 a awm a, stall 20 hawn a ni. C. Lalremsiama, Joint Director pawh in thu sawina a nei a, Lalthakima, ADHO, Lunglei in lawmthu sawina a nei bawk a ni.