Ni hnih chama lo zin India President Pi Droupadi Murmu chuan vawiin khan Eighth Mizoram Legislative Assembly Special Session ah thu a sawi.
Assembly Speaker Pu Lalrinliana Sailo chuan President Pi Droupadi Murmu chu lawmin India ram President 15-na leh Tribal zinga President hmasa ber ni tura thlan tlin ani chu a lawmpui thu a sawi a. President tanpuina leh Governor Dr Hari Babu Kambhampati kaihhruaina hnuaiah Mizoram chuan chak takin hma a sawn zel dawn a ni tih a sawi.
He hunah hian Mizoram Governor Dr Hari Babu Kambhampati chuan President chu lawmin, thlan tlin a nih hnu reilote chhunga Mizoram a lo tlawh chu lawmawm a tih thu a sawi a. Mizoram chu State muanawm tak a nih thu leh hnam hrang hrangte lungrual taka an awmna hmun a ni a, MLA-te nungchang pawh entawntlak tak a nih thu a sawi. President lo kal chuan MLA te chona thar pein an hna tha lehzuala thawk turin a puih ngei a rin thu leh a bikin hmeichhia te fuihtu tha tak a nih bakah taihmakna leh tumruhna nen chuan engkim a hlawhchhuah theih a ni tih a hriattir a beisei a. President lo kal chu lawmawm a tih thu leh nidangah pawh lo kal nawn leh turin a sawm a ni.
President Pi Droupadi Murmu chuan Mizoram Legislative Assembly hmaah thu sawiin ram nuam tak Mizoramah President a nih hnua a vawikhatna atan a lo kal thei chu lawmawm a tih thu a sawi a, amah an lo lawm danah lawmthu a sawi bawk a ni. President chuan Mizoram Legislative Assembly-in kumin May-a Golden Jubilee an thleng thei chu lawmpuiin; mipuite duh dan au chhuahpuia mipuite aiawhtu tha tak leh dan an siamna kawnga mi tam zawk hmakhua ngai thintu Member ni tawh leh ni mekte chu an fakawm thu a sawi. India-in zalenna a hmuh kum 75-na hian hun kal tawh nena inzawm tlat kan nih zia a tarlang a, he hunah hian hnam pasalthate inpumpekna chuan mitin huapzo hmasawnna thlen turin mitin hnenah chona thar pe se a duh thu a sawi. Mizoram leilungin engemaw chenah harsatna a thlen chungin tehna hrang hrangah hma a sawn zel thu a sawi a. Ayushman Bharat, mitin tana health coverage chu Mizo mipuiten an chhawr takzet thu a sawi a. Mizoram tana harsatna lian ber chu inkalpawhna a nih thu sawiin chumi sutkian chuan zirna leh hriselna kawnga hmasawnna mai bakah mipuite eizawnna a tih awlsam dawn avangin ngaihpawimawh a nih thu a sawi. Mipuite nun ti awlsam turin hmalakna hrang hrang kalpui mek a nih thu leh Digital India hnuaiah Mizoram chuan Central leh state sorkarte hmalakna te chu a chhawr zel tur thu a sawi bawk. Mizoram mai bakah North East state dangte hmasawnna chu ramin bung thar a kai zelna tan a pawimawh thu a sawi a. Asia chhimchhak leh Asia Pacific ramte nena inpawhna tha neih anih theih nan hmarchhak State te chu Act East policy hnuaiah ngaihpawimawh an nih thu sawiin, Mizoram chuan India-in a thenawm ramte nena inpawhna tha zawk neih a tumna kawnga tha thawhtu leh chhawrtu anih a beisei thu a sawi.
Vawiina Special Session hun khara lawmthu sawitu Chief Minister Pu Zoramthanga chuan President-in House-ah thu a sawi avangin lawmthu a hrilh a. Tribal hmeichhia President atana thlangtu sorkar laipui chu fakawm a tih thu a sawi bawk. Kum 1986-a remna thuthlung ziah chuan Mizoram chu India rama state ralmuang berah a siam thu sawiin, Mizoram chu hausa lo mahse remna leh muanna a neih chu thawnchhuah tlak khawpa ramdang te awh ber a nih thu a sawi.
Assembly Special Session-a thu a sawi zawh hian President Pi Droupadi Murmu chuan chawhma dar 11:50 ah Lengpui atanga Aizawl chhuahsanin Sikkim a pan a ni.
