Vawiin November ni 4, 2022 (Zirtawpni) hian Mizo Hnam Runah chhung inkhawm neih a ni a. Hun hnihnaah, C Lalramzauva, Adviser to Chief Minister leh MNF General Headquarters Adviser chuan Nationalism chungchang sawiin, Nationalism chu pawnlam inrawlhna tellova ramin inrelbawlna tha a neih theih nana hmanraw tangkai tak a nih thu sawi a. Mautam vanga Mizo mipuiten harsatna an tawh avangin mipuite rilruah Nationalism a piang a, mipui dinhmun siamthat nan leh chawikan a nih theih nan Mizo National Famine Front din a lo nih tawh thu a sawi a ni.
Adviser to CM chuan Nationalism avangin Mizo thalai tam takin ram leh hnam hmasawn beiseiin hun rei tak hma an lo lak tawh thu sawi a, Peace Accord avanga kan ramin hmel thar a chuankai thute leh Mizo Nationalism Movement avanga hnam anga hmasawn duhna leh rual elna thalaite rilruahah tuh a duh thu a sawi bawk.
C.Lalramzauva chuan, kan ram mila inrelbawlna kalpui dan tur Political philosophy duang chhuak tura rilru leh ngaihtuahna sen peih a tul a, chumi-ah chuan hlawhtlinna kan hmuh a rin thu a sawi bawk.
A sawi zel naah Pu Ramzauva chuan, hman lai kan pi leh pute rinawmna chhawm nung zelin, nghah loh dawr thleng ten kan nei ta, hnam dangten min awt ru em em thin a ni, a ti bawk. Mi ramah chuan rukrukte a hluar em em a, kan pi leh pute sulhnu chhhui zelin rinawmnate tlawmngaihna te, kan neih thar deuh deuh a, kan in fuih thar tawn a ngai hle a, Nationalism kan hriat deuh deuh pawh a tul hle a ni, a ti.
“Zoram hi a chhe vek tawh angin miten sawi mahsela; Pathian ringtute kan nih angin Pathianin min hruai zel ang a, Pathian leh kan ram tan Pathian rinchhan chungin kan sorkar leh ngei ka ring a ni, Pu Ramzuava a ti bawk.
