State chhunga dan lova kuhva rah phurh khap a nih laiin, Ngopa PS (Saitual District) team chuan an thu dawn bawhzuiin dan lova phurh kuhva rah tam tham tak hmun hnihah an man.
Ni 5 Nov. 2022 zing khan Ngopa PS (Saitual District) team te hian truck pakhat (Tata 407), Vanlalhmuliana (31) s/o Haulianbuka, Vangchhia, Champhai District nia inchhal khalh atangin dan lova tawlh kuhva rah bag 55 (bag khata Kg 80 zel awm) chu an man.
November ni 6, khan Saitual Police te chuan dan lova tawlh kuhva rah, a vaiin bag 140 (bag khata Kg 80 zel awm) chu lirthei pathum, 1) Lalhruai-tluanga (37) S/o Lal-ngura (L), Vengthar, Champhai, 2) Khenza-khupa (32) S/o Thang-tinmanga, Dinthar Veng, Champhai leh 3) Justin Zomuansanga (20) S/o H. Ruatthanga nia inchhal te khalh atangin KVI Godown, Saitual bulah an man. Heng thil mante, lirthei leh a khalhtu te hi dan anga hma lak zel turin Superintendent, Custom Preventive Force, Seling hnenah hlan an ni.
