School Education Minister Lalchhandama Ralte chuan vawiin khan SCERT Auditorium-ah SCERT buatsaih Science leh Mathematics-a tithate chawimawina a hmanpui.
Minister chuan he hunah hian thusawiin zirlai titha lawmman dawngte chu an thiamna leh theihna ram tana hmang tangkai ngei turin a fuih a. Mizoram UT kan nih laiin Assembly session-in zirlaite chu Science leh Mathematics thiam tura cho chhuah an nih theihnan zirlai tithate chawimawina an lo duang chu a hlawhtlinna hmuh tur a tam ta hle a ni a ti a. UT hun laia High School-a Science leh Mathematics zirtirtu-a Mizo awm mang lo kha tunah chuan Mizo thalai lak tur tam tak an lo awm ta a ni a ti. Sorkarin zirna kawnga hma a laknaah Zirlaibute hi Mizo zirlaiten mahni tawng ngeia an thiam theih nan Bilingual textbook a siam a ni a, peih fel tep a nih thu leh pawl 9 leh pawl 10 zirlaibu atangin bul tan a nih tur thu a sawi.
Minister chuan kumina lawmman dawngte chu Zoram hmun hrang hrang atanga lo kalkhawm an ni a, hei hian tlang hrang hranga zirtirtuten lawmman dawng pha an chher chhuak thei a, zirlaite pawhin an tlin vek tih a lantir a ni a ti a. Hmun hrang hranga zirlaite chu he incentive cash award dawng thei an ni tih in hria a tan la zel turin a fuih bawk.
He hunah hian School Education Department Secretary Dr. Lalzirmawia Chhangte chuan Science Laboratory Manual tlangzarh in, tunlai naupangte hian zir ngai lova thiam tura inngaihna an nei lian a, thil tam tak hi an thiam mai bawk a, hei hi chawhthawh thiam a tul thu leh competition rilru lo tlahniam ta pawh hi chawisan vat ngai a tih thu a sawi.
Incentive Cash Award for Proficiency in Science & Mathematics hi kum 1978 atang khan sem tan a ni a, kumin hi vawi 45 semna niin, HSLC atangin mi 66 leh HSSLC atangin mi 20, an vaiin mi 86 in lawmman hi an dawng a. Science leh Mathematics a titha chawimawina dawngte hi pakhatna lawmman dawngten full mark 100 an hmu a, pahnihna dawngten mark 99, pathumna dawngten mark 98 an hmu a ni.
He chawimawina hunah hian School Education, SCERT, MBSE leh Samagra Shiksha officer te, lawmman dawngtu school Principal, Headmaster te, zirlaite leh an nu leh pa te an kalkhawm a ni.
