Govt. Aizawl North College zirlaite chuan vawiin khan an Students’ Union te huaihawtin an college hmunhma chungchanga sorkar chunga lungawilohna lantir na’n an college kawtah ‘sit-in protest’ an nei a, motor kawngpui pawh an dang ping.
Aizawl North College zirlai hruaitute chuan college ram leh hmunhma tur chungchangah hian vawi tam tak sorkar thuneitute an hmu tawh niin an sawi a. Sorkar aţanga tihhlawhtlin mai tur anga tawngkam an dawn fo hnu-ah hlawhtlinna an la hmuh loh avangin vawiin hian lungawilohna an lantir ta tih an sawi bawk.
Vawiinah khan chawhma dar 10 vel atangin an college kawt kawngpui, Ramhlun North vengah an pungkhawm a, chawhnu lamah sorkar atanga thu lawmawm an la hriat loh avangin kawng an dang zui a. Magistrate leh zirlai hruaitu aiawhte an inbe na a, an duh ang thu a la awm lo tih Aizawl North College zirlai hruaitute chuan an sawi a. Tlai dar 3:30 bawr vel khan zirlai pungkhawmte hi an ţin darh a, tlailam leh zan thlenga sorkar atanga an lungawina khawp thu an dawn loh chuan naktukah hian lungawilohna lantir chhunzawm an tum tih zirlai hruaitute hian an sawi a ni.
Aizawl North College zirlai hruaitute chuan an college in kum 2015 atangin Trade & Commerce building, Ramhlun North Bazar chu an luahhawh tawh thu an sawi a. Kumin December thla hian an luah theih hun a tawp dawn tak avangin tuna zirlai 1,560 awm mek te class kalna hmun turah an buai takzet thu an sawi a. College building chungchangah hian Higher & Technical Minister, UD&PA Minister bakah Chief Minister-ah pawh an lo hmuh fo tawh thu an sawi a. Bethlehem Venga sahuan hmun hlui te, CWC mual Zemabawka mi te, DIET ram ţhenkhatte leh LAD pisa te pawh sorkarin a pek theih mai thu tein an lo sawihmuh tawh tih an sawi a. Chungte chu a hlawhchham vek hnuah Chief Minister hmuh nawn leh a nih thu leh RAY Building, UD&PA ram ruak kawhhmuh nawn leh an nih thu zirlai hruaitute chuan an sawi a, hemi chungchangah pawh hian hma an lak viau tawh laiin Chief Minister hmuh an tum pawha an hmuh theih tak loh avangin zirlaiten college ram chungchanga an hmalakna chu a hlawhchhama an ngaih thu sawiin, lungawilohna lantir mai a lo ngai ta niin an sawi bawk a ni.
