Vawiin 12th November, 2022 (Inrinni) hian Hachhek bialtu Lalrindika Ralte, MLA chuan a bial chhung tlawhin Tumpangluiah vantlang inkhawm neih a ni a. MNF VC member pakhat bakah Voter 42 Congress Party-ah a lawmlut bawk.
Lalrindika Ralte chuan, “Tunhnaiah sorkar tha siam duh leh Chief Minister mi rinawm leh mi dik duhin Aizawl leh Mizoram hmun hrang hrangah Congress zawmtu an pung zel a. Aizawl Municipal Corporation huamchhunga Local Council member-te pawhin tunhnaiah Congress an zawm thar a, vawiinah MNF atang bawkin VC kan neih belh leh a, a lawmawm takmeuh a ni,” a ti a. Hei hi bialtu MLA leh Congress party-ah beiseina mipuiin an neih zia lantirtu nia a hriat thu sawiin, Pu Rindika chuan, “Mizoramin nitinin sorkar tha siam turin hmalam a pan zel a. Sorkar tha hi mi retheite hian kan mamawh zual hle a ni. Tin, sorkar sum hi mipui kan awm avanga awm, mipui sum a ni a, chuvangin sorkar sum duh duha hman hi mipuite hian kan haw hle tur a ni. Vawiina Congress party zawm thar tute pawh hi ram leh hnam hmasawnna tura rinawm leh nghet taka dinga hnathawk turin kan lawmlut che u a ni”, a ti bawk.
Lalrindika Ralte hian Tumpanglui leh New Eden khawtlang mamawh chi hrang hrang bakah Kawrtethawveng khaw tan khawchhung bawlhhlawh paihna tur motor, Tractor Tipping Trailer leh VC House a hman tur Water Cooler a hlan bawk a. A bial chhung hmun hrang hrang a tlawh chhunzawm dawn a ni.
