Mizoram Pradesh Congress Committee (MPCC) chuan vawiin khan Aizawl Press Club ah chanchinthar lakhawmtute kawmin, “Tunlai hian Aizawl Municipal Corporation (AMC) chuan AMC area veng hrang hrangah Property Tax a khawn mek a. Property Tax punna rate sang lutuk avangin chhungkaw tam tak an buai hle. Nikum 2021-2022 a Tax an pek zat atanga za zela 60-80 vela pung chhungkaw tam tak an awm a ni.
Property Tax hi India ramah chuan Municipal tinte sum hnar lian ber pakhat a ni thin a, Property Tax lakna tur dan pawh fel takin a awm vek a ni. Aizawl Municipal Corporation (AMC) area-ah pawh ni 16.6.2015 atangin Property Tax hi lak tan a ni a. Kum engemawzat AMC area a cheng in leh lo neiten Property Tax hi kan pe tawh a ni,” an ti.
Press conference kaihruaitu Dr.Lallianchhunga, MPCC Media Department Chairman chuan, “The Mizoram Municipalities (Property Tax) Management Rules, 2014-in a sawi danin Property Tax rate hi rules in a sawi danin kumtin January thlaah Board of Councillors-in a hunlai mil turin an siamfel thin tur a ni a. Chuvangin, thil man hlutna sang zelah PropertyTax hi a pung zel tur pawh a ni. Tin, miin a in a zauh emaw, a sak belh, property a neih belh emaw chuan a a chawi zat a pung ngei tur a ni bawk.
“Amaherawhchu, tuna Aizawl Municipal Corporation (AMC)-in Property Tax a khawn mekah hian a pun dan a mumal lo hle a. In sak belh miah lo, khawih danglam miah lote zingah pawh nasa taka pung a tam hle a ni,” an ti a.
Tax petu khua leh tui (citizen) thenkhatten kum 2021 leh 2022-a Property Tax an pek zat leh a punna chu hetiang hian an tarlang.
2021-2022 2022-2023 A punna A punna %
Rs. 780/- Rs. 18110/- Rs. 17330/- 2221.79%
Rs. 350/- Rs. 2057/- Rs. 1707/- 487.71%
Rs. 1238/- Rs. 6682/- Rs. 5444/- 439.74%
Rs. 1198/- Rs. 5864/- Rs. 4666/- 389.48%
Rs. 1192/- Rs. 5312/- Rs. 4120/- 345.63%
Rs. 1008/- Rs. 3222/- Rs. 2214/- 219.54%
Rs. 1673/- Rs. 6067/- Rs. 4394/- 262.64%
Rs. 1600/- Rs. 4584/- Rs. 2984/- 186.5%
MPCC chuan, “Khawvel khawi ramah pawh chhiah hi pek thin a ni a, ram changkang apiangah chhiah hi a sang mai niin a lang. Amaherawhchu, mipuiin chhiah an pek danah kalphung fel tak a awm thin a, mipui chhiah pek tlingkhawm hman danah pawh mipui thikthu a chhe hle thin. Khua leh tui kan nih angin chhiah hi kan pe tur a ni a, amaherawhchu, tuna AMC Property Tax pun dan hi chu hriatthiam theih a ni lo a, dik lo taka mipui rawkna a ni. Tax an pek tur a san lutuk avanga complain tu tam tak an hlawhtlin avangin thil dik lo a tam tih a chiang hle. Central sorkarin Municipal (AMC) puala pawisa a rawn pekte, Pu Zoramthanga kaihhruai MNF sorkarin a hren sak rei lutuk avangin AMC hian pawisa an nei thlawt lo a, AMC-a thuneitu MNF Councillor-te hian Property Tax sang tak hmangin mipui an rawk ta mai em ni tih hi kan zawhna a ni.
“AMC hian Property Tax a khawn mek, a punna sang lutukte hi a rang thei ang berin en nawn leh sela, assessment ti tha leh vek rawh se. Dik lo taka Tax an lo laksak tawhte pawh The Mizoram Municipalities (Property Tax) Management Rules, 2014, Rule 28 (1) in a sawi angin a rang thei ang berin pekir leh rawh se. Tin, Rule no. 39 leh 40 in a sawi angin Property Tax chungchanga lungawi lohna neiten lungawilohna an thlenna tur leh a chingfeltu tur Municipal Appellate Tribunal hi a rang thei ang berin din bawk rawh se,” an ti bawk.
