Vawiin ni 14 November 2022 (Thawhtanni) Chawhnu dar 2:00 khan MZP General Headquarters hruaitute chuan MZP Pisa Pui Treasury Square-ah Khawzawl to Champhai leh Dulte to Kawlkulh kawnglaih hnathawktu, NHIDCL hnuaia company pahnih Balaji leh Dhariwal Builtech Limited hotute a ko a. Ministry of Road Transport and Highway kaltlanga NHIDCL ten kawng laih leh siam hna an thawh mekah complaint a awm avangin NHIDCL hnuaia hnathawktute hi koh anni.
MZP hruaitute chuan tun hnaia Mizoram chhung hmun hrang hrang a, kawnglaih hnathawh mekah NHIDCL hnuaia company ten environment ti chhe zawng leh lung tha lo hmang a, hna an thawk thin chu tha lo an tih thu leh kawng siamna lung leh hmanraw tha zawk hmang tura an duh thu an hrilh a. Environment ti chhe zawng leh lung tha lo hmanga kawng siam hna an thawh zel chuan na zawkin MZP in hma a lak tur thu an hrilh a ni.
NHIDCL hnuaia company pahnih Balaji leh Dhariwal Builtech Limited hotute chuan environment ti chhe lo zawnga hma an lak thu leh a theih chen chenah quality an maintain zel tur thute, hmun thenkhatah ram fel lo avangte leh lung tha an hmuh pawh a lakna hla lutuk avanga harsatna an tawh thu te an sawi.
MZP chuan Ministry of Road Transport and Highway kaltlanga Mizoram hmun hrang hranga kawng laih leh siam hna thawh mekah a thawktu NHIDCL hnuaia company hrang hrangte chu tha taka thawk turin a hriattir nghal a. Zoram mipuite tana harsatna thlen zawnga hma la lo turte leh kawng siam hna thawh nan hmanraw tha leh tlo chauh hmang turin kawng siamtu company-te a chah a. Environment ti chhe zawng leh quality maintain lo a kawng siam an awm chuan na takin MZP in hma ala chhunzawm dawn a. MZP chuan Company lung hman leh a hnathawhte a hmunah kalin vawi hnih a endik tawh a. November thla tawp lam hian a vawi thum nan kawng siam hnathawh a hmuna endik turin MZP a thawkchhuak leh dawn a ni.
