RD Minister hovin Development Committee for MNF Returnees at Maumual thukhawm

Aizawl Nov. 14. 2022 : Mizo Hnam Sipaite (MNF returnees) Maumual, Chaltlang rama chenna in ngaihsak tura din ‘Development Committee for MNF Returnees at Maumual’ chu an Chairman Lalruatkima hovin a pisa ah vawiin khan an thukhawm a, Land Revenue & Settlement Directorate in House Site Plan an ruahman chu thlirho niin an pawm nghal a ni a, a hmunah uluk taka theh nghal tur a ni ang. Vawiin thutkhawmah hian Maumual ram awmna bialtu MLA, Animal Husbandry and Veterinary board vice-chairman ni bawk C. Lalmuanpuia pawh meeting-ah hian a tel a ni.

Meeting kaihruaitu Lalruatkima chuan kum 1986-a India sawrkar leh Mizo National Front ten inremna thuthlung an ziah hnua hnam pasaltha rawn hawte pualin Maumual ram hi theh a nih thu a sawi a, khatih hun lai khan plot 650 vel awmin a hmun hi khang hun lai kha chuan a hla deuh leh thlaler deuh anga a lan avangin chenna in sa duh pawh an awm mang lo niin a lang a, tunah erawh chuan chutiang a ni tawh lova, hmun tha leh rem tak a lo ni tawh a, sawrkarin Ex-MNA te in leh lo ngaihtuahsak hi a ngaihpawimawh avangin theihtawp chhuahin hma kan la a, House Site Plan siam hmasak kha kum 30 chuang fe liam taah a nih avangin tunah hian uluk leh tunlai thiamna changkang zawk hmanga House Site Plan hi siam that leh tum a ni, a ti a. Hemi chungchangah hian Land Revenue & Settlement Department chuan August ni 24, 2022 khan thuchhuah an siam tawh thu sawiin Maumual House Site Plan atan re-survey neih tur tih a ni a, lirthei kalna tur kawngte sial a ngaih tur thu leh heng avang hian a hma a plot lo awmsa te pawh tihdanglam a ngai dawn lo thei lova, kawng sial vanga thlai tihchhiatah compensation pek a ni dawn lo bawk a, House Site Plan thar hi tihfel a nih hnuah a hma a mi kha thiah a ni dawn tih a sawi bawk a, Maumual rama pass/lsc neite leh Maumual ram chhehvel veng hrang hrangte chu ngaihven a beng chhi turin a chah bawk a ni.

Thukhawm hian kum 1987 a maumual ram House Site Plan an thlirho bakah Revenue Department in survey an neih hnua House Site Plan/Project an siamte an thlirho bawk a, he ruahmanna ang hi chuan in tin hi kawngin a pawh vek dawn a, vantlang hmun tur chi hrang hrang ruahman tel a ni bawk a, tun thla chhung hian the zawhfel Revenue Department lam chuan an tum a ni. Maumual ram the zawh fel a nih veleh PWD leh DM&R ten DPR an siam ang.

Meetinga report a nih danin Maumual ram chhunga ram nei in report zat hi mi 751 (Lsc – 722, House Pass – 16, WRC – 2, Misc – 3, Garden pass – 1, VC Pass – 7) an ni a. Report lut atanga House-Site Plan chhunga awm tih hriat mai theih hi 409 awmin, additional plan chhunga mi hriat theih hi 17 an ni a, Plan chhunga mi an ni nge ni lo hriat theih loh 325 an awm mek a ni. Vawiin meetingah hian Land Revenue & settlement, PWD leh DM&R hotute an tel bawk a ni.