Aizawl Nov. 15. 2022 : Mizo Hnam Runah inkhawm tawi vawiin khan neih a ni a, he hunah hian Chief Minister Zoramthanga chuan thu a sawi a. Mizorama hmun hrang hranga kawng siam nan vaibelchhe 6,664 Union Ministry of Road Transport & Highways chuan an rawn pe dawn tih a sawi.
Chief Minister chuan Dt 11.11 2022 khan National Highways siam hnathawh chungchang enhona meeting Guwahati-a neih chungchang a sawi a. “He meeting-ah hian hun dang ang lo takin sawiho tak takin kan sawiho,” a ti.
CM chuan Union Minister of Road Transport & Highways Nitin Gadkari-in Mizoram kawng siamna tura sum pek tur a puang tih a sawi a. “Zorinpui – Longmasu inkar 2-lane kawng, 28 km a thui vaibelchhe 764 man tur te, Vairengte-Sairang inkar 4-lane (package 7 & km 21 a thui, vaibelchhe 1,400 man tur te, Aizawl bypass road 2-lane, km 32 a thui, hmun thuma leiverh tur km 2.5 nen vaibelchhe 3,000 leh Seling – Tuivai inkar 2-lane kawng km 122.5 a thui vaibelchhe 1,500 te a ni,” a ti a. MoRTH Minister Nitin Gadkari hian Mizoram rawn tlawh thuai a tum thu leh lei pahnih rawn present a tum thu CM hian a sawi bawk.
Chief Minister chuan Vairengte atanga Kawnpui kawng laiha compensation buaina awm pawh chin fel a ni ta mek tih a sawi a. “Forest lamah buaina a awm tawh lo tura ngaih a ni a, a hmu turte’n compensation an hmu thuai thei tawh tur hi a lawmawm hle a ni,” a ti.
Kuhva chingtute harsatna tawh chungchang sawiin, CM chuan, “Kuhva chungchanga harsatna hi Central lam hmalakna a ni. Mizoram, Tripura leh Assam mawh leh tih duh loh a ni lo. Khu lama mawhphurtu ber hi kawh chat tur kan hre lo a, kan hre tan tawh a ni,” a ti a. “Kuhva chungchangah hian Assam, Tripura leh Mizoram te kan mang a ang tlang ta ringawt mai a ni. Assam Chief Minister nen kan inbe thin a, theih tawpin Delhi kan dawr a, Tripura CM pawh a mang a ang ve hle a ni. Mizoram MP pahnih Pu C Lalrosanga leh Pu K Vanlalvena pawh kuhva lama harsatna sukiang tur hian theih tawpa hma la turin ka ngen a. Delhi lam hi tih tak takin kan dawr a, kan su mek a, kan sut hlawhtlin thuai ka ring,” a ti.
Zoramthanga chuan, “Financial year kal mekah chhungkaw SEDP chhungkaw singruk hnenah Rs. 50000/- theuhin sem mek zel a ni a. Chhungkaw 600 vel additional pek an ni dawn bawk. Financial year tharah hian chhungkaw singruk emaw a aia tam emaw pek leh hram kan tum dawn a ni,” a ti a.
MNF president chuan, “Covid hripui avanga India leh Mizoramin harsatna kan tawh mek chu advantage-ah an hmang a. ‘Hei pawh an pe lo’ tihah ringawt an buai a, opposition ho thusawiah hian tui a tling tak tak lo. Min beihna thu hrang hrang hi a dawrawm hlawm hle a ni,” a ti a. “MNF te hi Pathianin kalna kawng mumal tak min siam a, inthlan leh lo awm turah pawh hian varparh arsi chu a eng zual zel ang,” a ti bawk.
