India ram hmundang te rualin vawiin khan Janjatiya Gaurav Diwas 2022 chu Mizoram hmun hrang hrangah lawm a ni a. Aizawlah chuan Larsap Hari Babu Kambhampati chu khuallian a ni a. Dr K.Beichhua, Minister of State, SW&TA chu khualzahawm a ni. Kumtin November 15 hian Janjatiya Gaurav Divas emaw Tribal Pride Day tia hriat hi Tribal Mihrat khawkheng leh zalenna sualtu Birsa Munda hriatrengna leh chawimawina puala hman a ni a. Tribal te India ram culture a an pawimawhna leh India ram tana an hnathawh ropui tak te chawimawina ni pawh a ni bawk a. JGD 2022 Aizawla program buatsaih bik hi Cultural programme anga hman a ni.
Larsap chuan Tribal te pual liau liaua ni bik, India sawrkarin a buatsaih chu lawmawm a tih thu a sawi a. Tribal te hian India ram zalenna atana zalenna sual a nih lai khan an theihna sang tak an lo hlan tawh a. India ram ropuina leh hmasawnna atan Tribal te an thawh hlawk em em a ni a ti a. India sawrkar pawhin Tribal te a dah pawimawh zia chu India President atan Tribal hmeichhia a ruat atang hian a chiang hle a ni a ti.
Lalnu Ropuiliani chanchin a hriat tawh thin thu sawiin, a huaisenna leh a inpekna chu ropui a tih thu a sawi a. Mizo lal te leh an khua leh tui te khan Kumpinu Sawrkar rorelna dodalin an lo do thin a. Kha kha Freedom fighter kan tih tak te pawhin an hmalak dan a ni a ti. Chuvangin, thangtharte chu an pi leh puten zalenna an sual a ni tih hria a inchhuang turin a chah a. Larsap chuan Janjatiya Gaurav Divas chu Tribal te nunphung leh khawsak dan chawimawina ni a ni nghal bawk tih a sawi a. Mizoramah pawh hnam zia leh hnam thil te uluk takin vawn nun chhunzawm a ni zel chu tha a tih thu a sawi a. Hnam zia rang leh nunphung humhim chu thil pawimawh tak leh hnam anga ngaihpawimawh tur a ni a ti.
Dr K.Beichhua, Minister of state, SW&TA chuan Tribal te pawimawhna hriaa India Sawrkarin Tribal te puala ni bik a siam chu lawmawm a tih thu a sawi a. India ram ropui takah hnam chi hrang hrang kan khawsa za a. Heng zingah hian Tribal te pawh hi India ram ti ropuitu leh ti famkim tu kan ni a. India in zalenna a sual pawh khan Tribal zingah santhal, Bhil, Khasi, Naga leh Mizo te bakah Tribal hnam tam takin British Sawrkar kha an dodal a. India zalenna sualtu te zingah pawh Tribal mi huaisen leh langsar tak tak awmin Birsa Munda pawh hi chung ho zinga mi chu a ni a ti a. Zalenna sualtu a ni mai lova, Tribal mite dinhmun chawisanna kawngah sulsutu a ni bawk a ni a ti.
Mizoram pawh India ram zalenna sual kawngah khan midangte thurualpui kher lovin kan lal te khan zalenna an sual a. Kumpinu sawrkar rorelna kha dodalin Mizote duhdana khawtlang inrelbawlna leh an inenkawlna te kalpui leh theih na turin Sapho kha an bei thin a. Mizo lal te khan zalenna an sual lo tiang zawnga sawi an awm thin chu tha lo a tih thu a sawi a. India ram awm hmain tuna India lo ni ta chhunga hnam hrang hrang te anmahni awmna hmun theuha British sawrkar lo dotute chu freedom fighter an ti mai a ni a ti. “Lalnu Ropuiliani thiltih ropui tak te kha India sawrkar pawhin a ngaisang a, keini pawhin kan chhuang a, ama hriatrengna leh chawimawina atan Ropuiliani Museum, Kelsih a sak mek pawh sak zawh thawkhat a ni tawh a ni”, a ti. Mizoram mipui tam zawk te chu Tribal kan ni a, kan hmasawnna turin central leh state sawrkar tangkawpin kawng hrang hrangah hmalakna pawimawh tak tak kalpui mek a nih thu a sawi bawk.
JGD 2022 puala cultural program ah hian hnam lam chi hrang hrang cultural troupe ten an entir a, malzai te ngaihthlak a ni a, pipu zai chi hrang hrang hrang ngaihthlak a ni bawk. He ni hi Tribal te hlawhtlinna pholanna hun a nih angin Mizorama mi chhuanawm tak tak te chanchin leh an hlawhtlinna kawngzawh te thlirho a ni a. Powerpoint Presentation hmangin Jeremy Lalrinnunga, Weightlifte, James Dokhuma, Padmashree awardee, Vanhlupuii, zaithiam, Laltluangliana Khiangte, Padma Shree Awardee leh R.Lalhmangaiha, Entrepreneur te chanchin leh an hlawhtlinna te thlirho a ni.
