ZPM chuan thuchhuah siamin, “MNF sawrkarna Chakma Autonomous District Council (CADC) chu Chief Executive Member (CEM) thlak boruak avangin tun term kallai atana a vawi ruk nan mumal lo takin a awm a. Hetiang bawk hian MNF sawrkarna vek Lai Autonomous District Council (LADC)-ah pawh MNF sawrkar lai mek chu MNF vek Member of District Council (MDC)-ten an paihthla tawh bawk. ADC sawrkarna leh Chief Executive Member (CEM) inthlak sek hi ADC inrelbawlna leh a huamchhung mipuiten an tuar hle a, hetianga ADC inrelbawlna mumal lo taka a awm thin hi ZPM chuan pawi a ti hle a.
“Tuna ADC sawrkarna siam mek MNF member-te hi Hnam Run pawhin thunun tumna leh, zahthlak taka ADC rorelna khawl buk tawn reng tihtawp tuma hmalakna a nei lovin a lang a. Lalna leh thuneihna ringawt atchilh hi mipui leh ram hmasawnnain a tuar a, hetianga ADC rorelna kalpui thin party hi eng level-ah mah rorelna chelh tlak an ni lo tih mipuiten hre reng turin ZPM chuan a chah a ni,” tiin an tarlang a ni.
