MPCC chuan “Sum leh pai enkawlna lama MNF sorkar an talbuai em avangin Mizoramin harsatna nasa tak a tawk mek a. MNF sorkar hnuaiah Mizoram hi LEIBA THANG (debt trap) ah a tang mek a ni,” a ti.
Vawiin khan MPCC Media Department Chairman Dr.Lallianchhunga chuan AIzawl Press Club-ah chanchinthar lakhawmtute kawmin, “Central leh State Sorkar sum leh pai chet vel dan muangchan avang te, ruahman lawk loh leh hriat lawk loh thil thleng a awm fo avangte leh a chhan tam tak avangin sorkar hian leiba a nei lo thei lo a. Tin, hmasawnna hnathawhna atana pawisa tam tham kan mamawh miau avangin kum tina tlem tlema rulh turin sorkarin Loan a la fo bawk. Chutiang avang chuan State kan nih, kum 1987 leh a hmalam atang tawh khan leiba hi kan nei chho ve reng a, kan rul reng bawk a, a changin kan leiba hi a pung a, a changin a tlahniam thin. Chutiang chuan kum 2018 Congress sorkar kum tawp thleng khan Mizoram sorkarin leiba cheng vbch. 7315 kan nei a ni.
“MNF sorkar hnu kum 3 chhung lek (2019-2022) hian Mizoram leiba hi cheng vaibelchhe 12553.08 ah a pung chho ta a, congress sorkar tlak hnuah Mizoram leiba hi cheng vaibelchhe 6000 dawnin a pung hman tihna a ni. Mizoramin state a nih kum, kum 1987 atanga kum 32 chhunga leiba a neih chhoh zel tlingkhawm leh MNF sorkarin kum 3 chhung leka leiba a neih hi a inzat thuak tawh a ni. Hetiang khawpa leiba pung chak hian Mizoram sorkar hi a la awm ngai lo a, sum leh pai enkawlna kawngah MNF sorkar ang em em a hlawhchham leh talbuai hi Mizoramah an la awm ngai hek lo. Hei hi Mizoram mipuiin kan hrawn mek MNF sorkar that loh zia chiang taka tilangtu a ni.
“MNF sorkar hian a sum leh pai mamawh hmuh nan puk tur a hriat a piang a puk ta hmiah hmiah mai a. Open Market Borrowing (OMB) hmanga RBI atanga kumin (2022-2023) a a puk theih zat tura bituk cheng Vbch 990 pawh a thleng tep ta, May 2022 atang khan thlatin deuh thaw, October tiam loin, Mizoram sorkar hian OMB hmang hian RBI atangin pawisa a puk reng a. Sorkar hnathawk hlawh pek dawn apiangin puk tur a zawng a ni ber. Sorkar lo awm leh tur tan pawha rulh huphurhawm tak, chet ti harsa tham leiba an hnutchhiat ngei dawn a ni.
“Sorkar kum (2022-2023) kal mekah hian Mizoram sorkar leiba rulhna atan Budget-ah cheng vbch 1337.90 dah a ni a, hei hi hmasawnna hnathawh tak takna tur sum (Capital Outlay) atana an dah cheng vbch 2663.14 zat ve hmawk a tling. A actual-ah chuan leiba rulhna atan hei aia tam hi an hman a ngai ang. Kum 2020-2021 ah pawh khan Capital Outlay-ah cheng vbch 1125.97 an dah laiin, a aia tam daih cheng vbch 1617.89 chu leiba rulh nan an hmang a ni.
“Sorkar hnathawkten a hun taka hlawh lak an nei thei ta reng reng lo a, GP Fund an la thei hek lo. Sorkar hnathawk pension-te pawhin chhuahpui nghal tur pawisa an nei thei ta lo a. MNF sorkarin Health Care hnuaia inziak lut chhungkaw sang tam takte Medical Bill a pe thei lo a, contractor-ten a hun takah bill an la thei lo bawk. Heng zawng zawng hian nasa takin ram chhung sum leh pai che velah nghawng a nei a, a nghawng chhe tak hi mipuiin kan tuar mek a ni. Hei hian MNF sorkar that loh zia a tichiang hle.
“MNF Sorkar hnuaiah hian MNF MLA fel tak tak awm mah se, a lu ber Chief Minister enkawlna hnuaiah an duh ang thil tha pawh Mizoram tan an ti thei lo a, thil tha an hriat pawh an sawichhuak ngam chuang lo a; an mit hmuh lai ngeiin Mizoram chu Leiba Thangah a tang ta mek a ni. Tawngkam thiamna ringawtin ram min hruai tha lo tih hi Mizoram mipuiin a takin kan hre mek a. Leiba thanga tang mek Mizoramin a mamawh ber chu ram hruaitu – sum leh pai enkawl thiam, eirukna a fihlim, enchhin pawh ngai lo, mi rintlak leh ram hmasawnna duh tak taktu a ni,” a ti.
