Vawiin khan Mizoram leh Assam Sawrkar hotute leh aiawh ten Mizoram leh Assam ramri buai chinfel chungchangah High Level Delegation inbiakna zing dar 11 ah Hotel Vivanta Guwahati ah an nei a. Mizoram atangin High Level Delegation hi Home Minister Lalchamliana in a ho a, Rural Development Minister Lalruatkima bakah Commissioner & Secretary Home Department H. Lalengmawia; Joint Secretary, Home Department Lalthiamsanga Sailo, OSD cum Joint Secretary David H. Lalthangliana bakah I &PR aiawhte an tel a ni. Assam lam High Level Delegation hi Border Protection & Development Minister Shri Atul Bora leh Environment & Forests Minister Shri Chandra Mohan Patwary ten hoin Principal Secretary, Border Protection & Development, Shri Gyanendra Dev Tripathi, Principal Chief Conservator of Forests, Shri MK Yadav bakah midangte an tel a ni.
Assam leh Mizoram Sawrkar Minister leh official te chuan hemi chungchanga inbiakna neia thuchhuah intawm siam tawh te thlir letin chung ngaituah chunga hmalakna awm thei nia an ngaihte an sawi ve ve. Hun rei tak sawihona an neih hnuin thuchhuah intawm Joint Declaration siam a ni a. Thuchhuah intawm ah Mizoram Sawrkar aiawhin Home Minister Lalchamliana a hming a ziak a, Assam Sawrkar aiawhin Border Protection & Development Shri Atul Bora in hming a ziak ve thung a ni.
Thuchhuah intawm ah hian Mizoram Sawrkarin ramri nia kan pawm chhunga khua awmte, an area huam te, a geo spatial extent te, heng hmuna chengte hnam chanchin leh chi te (ethnicity) leh chanchin dangte chu thla thum chhunga lakhawm nise tih a ni a. Heng chanchin thehluh te ramri buai chinfel tura atana la din tur State pahnih aiawte telna Regional Committee ten an enfel dawn a ni. Chanchin lakkhawm kawngah hian Assam Sawrkar chuan Mizoram hi a thei na naa an pui ang tih a ni.
August ni 5, 2021 ah Aizawl a inbiaknaa neia thuchhuah intawm siam chu State pahnih ten vawng nung zel se tih a ni. State pahnih ten ramri hrula cheng mipuite inkara boruak muanawm a awm zel thei nan thawk chhunzawm zel nise tih a ni a. Mizoram High Level Delegation in Mizorama kuhva chingtuten an tharchhuah state pawna Assam kaltanga an phurhchhuahnaa harsatna lian tak an tawh mek chungchang an thlen pawh sawiho niin, kuhva chingtute harsatna tawh mek chinfel anih theih nan State 2 Chief Minister te hnenah hei hi thlen nise tih a ni a.
Thuchhuah intawm ziah a nih hnuin Shri Atul Bora te chuan chanchinbu mite hmaa Joint Declaration hi a chhiarchhuak a. Lalchamliana chuan Mizoramin ramri kan pawm chu 1875 a inziah ang a ni a, he kan tanchan tihchian nan Joint Verification kan rawt a, mahse Assam lam chuan hemi atan helai bawra chanchin kimchang lakhkawm nise an ti a. Kan tanchan tihchian nan thla thum chhungin details te hi kan lakhawm ang a a ti. Mizorama kuhva chingtute tunhnaia an tharchhuah Mizoram pawmna Assam kaltlanga phurchhuahna kawnga nasa takin harsatna an tawk mek sawiin, India ram chhunga khua leh tui ten an tharchhuah hralhna kawnga hetiang taka harsatna an tawk hi a vanduaithlak a, chinfel anih vat thei nan Mizoram leh Assam Sawrkar te a rualin hemi chungchang hi Sawrkar Laipui sawi leh nawr a tul takzet a ni, a ti. Mizoram Sawrkar chuan ramdang tharchhuah kuhva Mizoram leh state dangte kaltlanga tawlhruk chu a vei in a la thu tak hle a, tunhnai pawh khan dan kalh a kuhva tawlhruk man a nih theih nan Check Post 2 siam belh a ni, a ti.
