Home Minister Lalchamliana’n tukin zing khan Guwahati atanga km 80 a hla, Mangaldai khuaa 3rd IR(Mizo) Battalion a Mizo police awm mekte tlawhin an hmunhma te a fang a, Sammelan a hmanpui bawk a ni.
Sammelan ah thusawiin Home Minister Lalchamliana chuan Mizo IR Assam- a awm te an chhehvela cheng mipuite leh vantlang nen inlaichinna tha an nei zel chu lawmawm tiin force reng reng te hi an bul hnaia awm mipuite nen thawhhona tha leh inlaichinna tha neih chu an tihmakmawh tur a ni a, hei hi nangni pawhin vawng nun zel turin ka chah duh che u a ni, a ti a. An kalna apiangah Mizoram tihmingtha thei emaw tihmingchhe thei emaw an ni tih hre reng chunga an duty-na te hlen turin IR police te a chah a ni.
Home Minister chuan Mizoram pawna kum 12 chuang an awm chhungin hel emaw misual emaw kutah boral leh hliam an awm lo chu a lawmawm tiin hei hi Pathian hruaina a nih thu a sawi. Hotute thu awih a, inthununna hnuaia awm chu police nih dan tur an hriat sa ni mahse hei hi sawi nawnin thil tha lo, an taksa tichhia a, an ngaihtuahna tibuai thei te tih lo leh heng laka insum chu ngai pawimawh turin police te a chah a ni. Kohhran thilpek leh rawngbawlna kawnga an luanchhuahnate chu ropui tiin hei hi chhawm nung zel turin a chah bawk a ni.
Sammelan programme hi Dinesh Kumar, DIG(Armed) in kaihruaiin B. Laldikpuia CO, 3rd IR in an Battalion chanchin sawiin, thilpek hlanna te a nei a. Jacob Hlychho in lawmthu sawiin hun a khar a ni. Home Minister hian tul dang leh Krismas atan an hman tur sumfai cheng sing sarih Battalion hotute kutah a hlan a ni.
Home Minister hian Mangaldai-a IR hmun a tlawh hnuin Mangaldai atanga darkar 2 leh a chanve tlana hla 3rd IR duty na post 2 – Nagrijuli leh Tamulpur te tlawhin helaia hmuna Mizo Police duty mek te chu an awmna apiangah Mizoram leh Mizote hmel timawitu ni zel turin a chah a ni.
3rd IR Battalion hi kum 2007 khan ding tanin 2010 atangin Mangaldai, Assam-ah an awm a. Chhatisgarh-a Naxal hel awmna hmunah te pawh tum engemaw zat tirh an nih bakah inthlan duty-ah pawh an feh chhuak nasa a. Hei bakah hian Assam a District 5 – Golaghat, Tamulpur, Hojai, Nagaon leh Darrang-ah te hmun 19 laiah duty post te an nei mek a ni. Tunah hian an vaiin mi 275 vel awmin chung zing mi 40 vel chu chhungkuain an khawsa mek a ni.
