“MPCC hotute chuan ni 17.11.2022 khan Aizawl Press Club-ah Press Conference kovin sawrkarna hun reitak lo chelh tawhte tihawmloh taka MNF thalaite’n kan ngaih, sawrkar leiba hmanga Zoram mipuite rilru hruaikawi an tum ni ngei a ngaih theihin thu an puang a. Hetiang hi thil awmdan zawk a ni e,” tiin vawiin khan L.Thangmawia, MLA MNYF president chuan Aizawl Press Club-ah chanchinthar lakhawm tute a hrilh.
L.Thangmawia chuan, “Central sawrkar leh State/UT sawrkar te hian sawrkar inrelbawlna kawngah leiba an nei vek a. Reserved Bank of India (RBI) Website in a tarlan danin Central sawrkar hian Cheng vaibelchhe 1,45,72,956 zet mai June, 2022 khan a nei mek a (Page 10, Quarterly Report of Public Debt Management, April-June, 2022), India ram state leh UT zawng zawngte pawhin leiba ṭhahnem pangngai tak an nei vek a ni (Annexure- I).
“MPCC unauten MNF sawrkar kum thum chhung a leiba hi cheng vaibelchhe 12553.08 a pungchho ta anga an tarlan hi khawi atanga data hi an neih nge? tih kan zawt duh a. Kan data hmuh theih zawng zawng atang chuan tuilet hnuah Mizoram leiba hi cheng vaibelchhe 12553.08 a la tling ngai lo hrim hrim a ni. RBI website ni 18.11.2022 a kan tlawh chuan India ram state/UT te leiba zawng zawng chiang taka tarlanna kan hmu a, he RBI data atanga India hmarchhak state te leiba chu hetiang hi a ni. Tin, a duh tan RBI Website lamah a en theih bawk.
“Mizoram hian India hmarchhak state zingah phei chuan a pawisa fai a ni emaw, a GSDP % a ni emaw, a chunga kum 6 chhung data (Table 1 leh 2) atang khian Sikkim tih lohah chuan Mizoram hian leiba kan neitlem ber zawk a ni. Congress sawrkar-in GSDP % anga leiba 38.9% a hnutchhiah kha kum thum chhung MNF sawrkar hian 31.2% ah a tihniam hman zawk hial a ni. Kan unau MPCC te data sawichhuah duhdan hi thudiklo hmang a ram mipui rilru hruaikawi tumna ni ngei a kan ngaih avangin Zoram mipui hma ah thupha chawi ngei turin MNF ṭhalaite chuan kan phut a ni.
“Kum 2018, December ni 15 khan Pu Zoramthanga kaihhruai MNF sawrkar thar lakluh a ni a. Mizoram mipuite’n beiseina sangtak nen sorkar hmalakna kan thlirchhoh lai in, budget hmasa ber pharh aṭanga thla 9-na (March ni 24, 2020) lek ah chuan khawvel a hrileng hlauhawm tak, Covid-19 hripui chuan Mizoram min rawn luhchilh ve ta reng mai a. Ram mipuite himna tur ngaihtuah a ngaihtak avangin Mizoram sawrkar pawhin lohtheihloh in Total Lockdown leh inkhuahkhirhna chi hrang hrang a puangzui nghal a nih kha. Khawvel a hripui leng Covid-19 avang hian International/Inter-State Border zawng zawng khar a ngai a, tualchhung ah pawh intlawhpawh a remchang lo a, kan economic activity hrang hrang pawh kumhnih dawn a chawl hial a ni.
“Hrileng in nasa taka Mizoram mai bakah India ram leh khawvel pum a tihbuai tak avang khan sawrkar pawhin budget-ah sum hmuhna tura alo ruahman lawk tamtak chu a hmu phak lo nasa hle a. Hmasawnna hna thawhna tura sum ruahman tam zawk pawh Mizo mipui dam khawchhuahna turin nasa takin a hmang ta zawk a ni.
“Covid-19 hian nasa takin Mizoram sum leh pai dinhmun a ti chhia a, hrileng avanga Mizoram sawrkarin central sawrkar atanga sum hmuhtur a kan beisei kan hmuh phak lohna hi cheng vaibelchhe 3000 chuanglai a ni hial a ni.
“Hetiang a Mizoram sum leh pai dinhmun derthawng taka a awm lai hian sorkar laipui chuan CSS sum pechhuak(release) vek turin India ram state zawng zawng a rawn ti bawk a. Mizoram sorkar pawhin kumin 2022 chhungin cheng vaibelchhe 600 chuang zet a CSS sum hi a pe chhuak tawh a ni.
“Finance Commission hi state hrang hranga sum semdan tur ruahmantu a ni a. Congress sawrkar hun hmasa 13th Finance Commission kha a ṭhalo hle a. Chuvangin kha tih laia Chief Minister zahawm tak, Pu Lal Thanhawla khan, “Kan sum dinhmunin a sen a kawk a ni”, a ti hial a. Congress-in sawrkar na an chantirh khan khatihlai a CM zahawm tak Pu Hawla khan Finance Department a enkawl a, mahse enkawl chhunzawm lovin Pu Liansailova leh Pu Lalsawta te hnenah a hlan chhawng ta ringawt a ni. Pu Sawta Finance enkawl lai, 14th Finance Commission kha aṭha chho ta hle a. Kha tihlai khan tu pawhin Finance Department hi enkawl se, ram sum leh pai dinhmun a ziaawm a ni tih chu Finance lam mithiamte chuan an hre ngei ang. Chu mai bakah Congress sawrkar khan kum 2015 atang khan zu a zuar ta bawk a. Sorkar-in zu a zawrh chhung khan zu chhiah (state excise) atangin cheng 2,63,61,58,397 (Vaibelchhe 263.61) zet a hmu hman a ni.
“Congress sorkar-in leiba tamtak a hnutchhiah chung leh, Covid-19 hrilengin nasa taka min tibuai chung pawhin Chief Minister leh Finance changtu Pu Zoramthanga chuan ram sum leh pai dinhmun siamṭha turin theihtawp a chhuah a, a hmalakna zarah Mizoram leiba pawh nasa takin a tlahniam tawh a ni. Mizoram sawrkar in sum leh pai inrelbawlna ah hun khirhtak atawk chung pawhin Mizoram leiba a tlahniamzel mai te hi MNYF chuan lawmawm kan ti a. Sawrkar hmasa hunlai ang a, ‘Sum Lapse’, sawithawm awm talo te, Financial Year tawp dawn a hnawhsarum taka zân khawtairek thlenga sum tamtak hmanral tum ṭhinna tihbo a ni chho ta te, Mizoram in sum leh pai ah harsatna vawr tawp a tawhlai pawh a sawrkar hnathawkte hlawh chatlak awm hauhlo a ala pe theizel te leh, Treasury khar ngailo a min hruaithei te hi Finance Minister-in ram sum leh pai a enkawl thiamzia lantirtu a nih avangin Finance enkawltu Chief Minister Pu Zoramthanga hi MNF thalaite chuan kan chhuang hle a ni.
“India ram leh Mizoram in Covid hripui avangin Financial Crisis atawk mek tih hi phatrual a nilo a. He hun thimtak hi kan kalpelh theihnan Mizoram mipuite’n lungrual taka ke kan pen tlan a ngai hle a. Ram tana kan thawhpui party dangte pawh inbeih lam ringawt men a meng lovin, Mizoram hmasawnna leh kan ram ṭhatna tura ngaihtuahna hmang turin MNYF Headquarters chuan kan sawm a ni,” a ti bawk.
