Mizoram Governor Dr Hari Babu Kambhampati chuan Inrinni khan Mizoram State Council for Child Welfare buatsaih Painting Competition lawmman semna Program PC Girls School, Mission Veng, Aizawl a neih chu a hmanpui.
He lawmman semna program ah hian Governor, Chief Guest ni bawk chuan Mizoram State Council for Child Welfare te hmalakna, naupang kawng chi hrang hranga harsatna tawkte tana an theih anga an thawhna te chu lawmawm a tih thu a sawi a. He pawlin India rama naupang huaisen chawimawina Mizoram aiawha lang tur hming an recommend thin thu sawiin, naupang 39 laiin chawimawina an dawng thei chu ropui a tih thu a sawi. MSCCW chu an hnathawh tha tak tak chhunzawm zel turin a fuih a ni.
He ni puala naupang lo kalkhawm te hnenah Governor chuan painting competition a an tel thei chu an vanneihzia a hrilh a. Naupang te chu an nunah thil tam tak an la hmachhawn dawn avangin finna an neih a pawimawh thu sawiin zirna ngai pawimawh turin a fuih a ni.
Governor chuan naupang te hnenah kawng engkimah rilru zau tak pu turin a hrilh a, hnam dang zia leh an nunphung te hriatsak a, kan hnam ziarang pawh midang te hnena phochhuah a, inzirtawn zel tur kan nih thu a sawi a, chu chu tunlai khawvelah hlawhtlinna rahbi pawimawh tak a ni, a ti.
He intihsiaknaah hian naupang 109 telin group 4 ah then an ni. Heng group ah hian vohbik naupang te pawh an tel ve bawk a ni.
Hemi puala inkhawm tawi hi Ngurbiaka, Executive Member MSCCW chuan kaihruaiin, an pawl thil tum leh hmalak tawhna te sawiin hun a hmang a. Hemi zawh hian Governor leh Lady Governor hnenah memento hlan niin lawmman semna in a chhunzawm a ni. Prof.Lianzela Executive Member MSCCW chuan lawmthu sawina neiin lawmman hlanna inkhawm hi zawh a ni.
Mizoram State Council for Child Welfare hi sawrkar hnathawk pension tawh leh kum upa lam khawtlang leh ram tana mi tangkai tak tak te telna pawl niin, tunah hian Social Welfare Minister chu President niin C Lalrinliana chu Working President a ni. Governor hi he pawla Chief Patron a ni bawk a ni.
He lawmman semna inkhawmah hian Governor Dr Hari Babu Kambhampati chu a nupui Lady Governor Smt. Jayashree Kambhampati, he ni puala Khualzahawm ni bawkin a tawiawm a ni.
