MNF Party Office Mizo Hnam Run inkhawm vawiina neih hun hnihna (politcal session)-a thusawitu MNF Vice President Lalthlengliana chuan, “Tunhnaiah Congress hovin an ngum khak hmu lovin sum harsatna chungchangah min bei a. An hunlai khan sorkarin sum a neih loh avangin Treasury vawi 30 chuang an khar,” a ti.
Congress hunlaia finance dinhmun chungchang sawiin Lalthlengliana chuan, “Sum an harsat avangin kum 2012-2015 chhung khan RBI atangin Rs. Vbc 1331.61 lai an puk a. CM Pu Hawla khan a khat tawkin ‘RBI-a kan sum dinhmunin a sen a kawk reng’ a ti reng a nih kha. Finance thiam intite khan tuna an president Pu Lalsawta hi Finance Minister a nih lai khan SSA sum Rs Vbc 70, sikul naupang uniform leina tur an ti-lapse a. Tin, Congress sorkar khan MNF sorkar thar hi leiba Rs. Vbc 7300 chuang min hnutchhhiah,” a ti.
“NLUP atan PM Special Package kan sem ang an ti a. PM Special Package a awm si lo a. State Plan Fund an hman avangin CSS cheng vbc tam tak matching share an pek theih loh avangin a kir phah a. CAG-in NLUP a audit report May 25, 2017-ah Mizoram Assembly-ah pharhah, Sorkar flagship program – NLUP thiltum a hlawhchham, tih a nih kha,” a ti.
Lalthlengliana chuan, “Congress sorkar khan sum awm loh avangin Hindi Teacher 1300 chuang, Forest Dept. hnuaia mi 200 chuang, RMSA Clerk 81 leh Lab Attendent 280 chuang an bantir a, Industry deptt hnuaia Mistiri bungraw sem an titawp a. Social Welfare atanga NGO-te hnena tanpuina pek thin Dekchi leh No bakah rualbanlote hnena bengdar leh zak dawh tiang pek thin an titawp bawk.
“Congress kum 10 rorel chhung khan MLA 5-ten an chhuahsan a. Corruption kaihhnawih avangin an Minister 2 leh MYC Chairman an bang a. Seal lem siam avangin an MLA 1 chu Central Jail a lut. Chief Minister khan a mimalin Helicopter hman manah mipui sum Rs. nuai 57.12 zet a hmang ral. Hetih lai hian MNF President leh Chief Minister Pu Zoramthanga chuan vawiin thlengin Sorkar sum tihek turin Helicopter vawi khat mah a la hmang lo.
“Zoram Medical College (ZMC) dinna tur khan MNF Sorkarin building 51 bakah infrastructure lian tham zawng zawng a sa a. Congress Sorkar khan ZMC-a thawktu, damlo leh zirlaite hman tur building 10 pawh a sa tling lo. Heti chung hian ZMC hi an kutchhuak ang hialin an sawi,” a ti a. “MNF Sorkar khan AR Lammuala sakna tur RG Stadium (Rs Vbc 20) lung a phum a, Congress khan Mualpuiah an suan a. Tuna Hawla Indoor Stadium tih hming an puttirte hi MNF sum sih chhuahsa tho a ni,” a ti.
CM Zoramthanga hmalakna sawiin, “Pu Zoramthanga tluka finance enkawl thiam Mizoramah an la awm lo. Kum 1998 khan Congress Sorkarin cheng vaibelchhe tam tak leiba min hnutchhiah chungin bul a tan a. PM Pu Vajpayee hnenah Peace Bonus Rs Vbc 182.45 chu a dil chhuak a. Baffacos-ah vaibelchhe tam tak sawi chhuakin awm lo ata ama remhriatnain bul a tan a. MNF Sorkar hmasa chhung khan Treasury khar a awm ve lo. Mautam tam lai pawhin a thlawna buhfai semtu a ni bawk,” a ti.
MNF Sorkar hmasaa development lian tham sawiin – te New Capital, Bawngkawn to Leitan kawng zauh, Millenium Centre, Ch. Saprawnga Truck Terminal, Ch. Chhunga Bus Terminal, Aizawl to Lunglei (World Bank Road). Chaltlanga Lalsawia Bus Terminal leh Aizawl Municipal Council a din bakah PMGSY hnuaiah thingtlang khua zawng zawng inkalpawhna kawngpui a lai chhuak vek a ni, a ti.
“Pu Zoramthanga kaihhruai Sorkar khan SSA leh RMSA bul a tan a. Police Deptt-ah post thar 3197 lain, Batallion 4 a din a. PWD, PHE leh P&E-ah E-in-C post thar a siamchhuak a. District thar 5 chu fuke kimin a siam a, Aizawl khawpui tan GAWS Phase-II a siam a, Mizoram University a din bawk,” Pu Thlenga chuan a ti a. “Heti chung hian Chief Minister Pu Zoramthanga, finance enkawl thiam lo anga Congress-ten an puh hi Tlawng vauka Mat dap an sawi ang chauh a ni,” a ti.
“MNF a lo sorkar khan hripuiin min nuai a, Congress Sorkar leiba hnutchhiah Rs Vbc 7300 chuang nen hripui kan hmachhawn a. Heti chung hian ei leh barah harsatna lian tak kan tawk lo. MNF Sorkar hlim khan District thar 3 chu a taka function-tir a ni. Congress kum 10 sorkara kawng chhe lutuk chu MNF sorkar tirhah siamthat vek a ni a. District tam takah phullem phah a ni a. Kan CM zahawm tak hian tun term tharah pawh Bamboo Link Road atan Cheng Vbc 100, Special Assistance Cheng Vbc 400, tunhnai maiah MoRTH atangin kawng thar tur leh a chhe siam nan Cheng Vbc 6664 lai sawi chhuah a ni bawk,” Lalthlengliana chuan a ti.
