Vawiin November 22, 2022 (Thawhlehni) hian PC Party Gen. Hqrs. Office, Treasury Sq.-ah PC Party chuan OB Meeting, Vanlalruata, President kaihhruaiin an nei a. Vanlalruata chuan tun hnaia sawrkar lai MNF leh eptu party Congress ten Mizoram leiba zat an inhnial chungchang sawiin, mipuiin thu dik kan hriat pawimawhzia sawiin ‘Nausen piang hlim pawh huamin mi pakhatin ₹96,417.27 zel ba ang kan ni,’ a ti.
Vanlalruata chuan, “India hmarchhak state zingah state te ber Sikkim dawta leiba ngah kan ni a. Sikkim hian bâ ngah hle angin lang mah se hmasawnna ruhrel ṭha siam nan an hman bakah, leiba rulh leh theihna tur infrastructure an neih phah thung. Keini erawh chuan hmasawnna ruhrel rotling leh leiba rulh theihna tur lam kan hawi lem loh avangin insawi thlamuan nana hman chi a ni lo.
Kumin kum 2022 hian Mizoramah mihring nuai 12, 27,000 vel awm tura hisap niin kan leiba zat tur awm hi ₹ 11,830.40 vbc a ni dawn a, chu chu a lu nunga chhutin mi pakhatin ₹ 96,417.27 zel ba ang kan ni dawn,” a ti a.
Budget Bu-ah, 2020-2021 kumah khan leiba zat BE: 87,503.00 lakhs niin RE: 1,88,044.11 lakhs niin 114.90% zetin a pung a. Actual-ah 1,59,522.74 lakhs daih niin 82.33%-in a pung.
2021-2022 kumah BE: 48,945.82 lakhs leh RE: 4,27,775.82 lakhs niin Actual erawh a la hriat loh a, 773.97%-in a pung.
Vanlalruata chuan, “Kum kal laiah hian BE: 1,31,289.58 lakhs leh keima Project chhinah: 2,39,380.29 lakhs niin 82.33% a ni. Tichuan, sawrkar kal mek dan thlirin kan leiba tur hi ₹ 12,553.08 crore vel a nih ka ring.
“Tunah hian leiba thangah kan âwk tawh a, nakum 2023-ah inthlanpui kan hmachhawn dawn a, chuta sawrkarna siamtu chu tu pawh ni se tun aṭanga leiba thang ata kan chhuah theih dan tur ngaihtuah a ruahmanna siam ve turin political party zawng zawng ka ngen a ni,” a ti bawk.
