Vawiin khan Tawna Hall, West Phailengah ZPM Dampa West Block Conference & Political Training neih a ni a; he hun hi Lalduhoma, Leader leh K Sapdanga, Working President ten hmanpuiin Block huamchhung atangin mi thar 306 lawmluh an ni an ti.
Lalduhoma chuan, “Kan minorities Bru leh Chakma unaute hi kan enhrang miah lo a, anmahni puala Central atanga sum lokal ten an hnen a thleng mumal lo tih kan hria; ZPM chuan an hnen thlen tir ngei kan tum a ni,” a ti a. “Sawrkar atana mipuiten an duh ber leh an rin ber ni turin final kan lut ta. Hemi thua chiang ber chu MNF unaute an ni; opposition emaw an inti a, ruling emaw min ti a, min bei vak vak mai a ni,” a ti a. “Kan policy tihhlawhtlinna turin hmasawnna ruhrel tha kan mamawh, hmasawnna nei turin power-a intodelh hmasak a pawimawh, chumi tur chuan lui khuah tur leh ni zung chakna lamah ruahmanna kan siamfel tawh a. Kawngpui tha, hriselna lama inenkawlna tha, thlai thar hralhna mumal te pawh kan mamawh a, chumi tur chuan policy kan siamfel tawh a ni,” a ti.
K Sapdanga chuan, “Mizoram hian Eirukna kan duh lo tak zet tih entir nan MNF hi kan dah ‘nil’ a ngai. Kan khingpui party thenkhat hian mipuite hi lamtanga sawm an tum lem lo, last minute-ah engemaw hum chunga chibai sem a tawkin an hria a, chibai paha hum tur thahnemngai taka tuak hi pawimawh an ti ber a, sum tuakpui atan hmanrua pawh an duhtui lo khawp mai, a rem rem, Mizo hmingin a daih loh thleng thlengin an hmang bawrh bawrh a ni. ZPM chuan chibai bawlhhlawh hi mipuite hmuhsitna tawpkhawkah kan ngai a, tih ve kan tum lo. Thingtlangah ZPM thli a tleh mek, Bru leh Chakma unaute an harh mek. Dawt leh thutak an thliar thiam tawh a, tumah inbumtir an tum tawh lo. MLA inthlan inbuatsaihna atan kum khat chauh kan la neih chhung hian, party dangte aia thawk nasa ber nih kan tum. Engti kawng zawng pawhin kan chak ngawt dawn lo. Hnehna leh chakna hi thuthluanga nghah chhuah chi a ni lo, rim taka thawh a ngai a, thawkrim ber party nih kan tum a ni. Ram tana manganthlak ber chu party ten an sorkar hnuah an policy an theihnghilh thin hi a ni. Sorkar kalphung thar din turin mi thar, rilru thianghlim la pu kan mamawh a, kan hmu mek. Budget pharh fo tawh nih hi chhuan tlak a ni lo a, budget la pharh lo hi hmuhsit chi a ni lo. Budget la pharh ngai lote sorkar awmna state hi hmasawnna lama hma hruaitu an ni zawk mah a ni,”a ti.
