“Mizoram hian sum leh paiah harsatna namen lo a tawk mek a. Sorkar hnathawkten tunhma angin thla tirah hlawh an la thei ngai tawh lova, Pension a chhuak te’n an pension pawisa dawng turin thla tam an nghah ziah a ngai tawh a. Health Care Scheme an kalpui mumal theih loh avangin cheng vaibelchhe tam tak Medical bill an ba mek a, mipuite’n Health Care Scheme-ah rinna an nghah ngam tawh loh avangin kum hmasa aiin kum kal mekah chhungkaw inziak lut pawh nasa takin a tlahniam a ni. Hetiang dinhmunah hian Mizoram hi kum 1987-a State a nih hnu hian a la awm ngai lo. Tun ang reng renga dinhmun chhia a kan din hi a la awm ngai lo a ni,” Dr.Lallianchhunga chuan a ti.
MPCC Media Department Chairman Dr.Lallianchhunga chuan vawiin khan Aizawl Press Club-ah chanchinthar lakhawmtute kawmin, “Ramin sum harsatna a tawh mek lai hian Mizoram Finance Minister leh Chief Minister ni bawk, Pu Zoramthanga chu a ngawi tlat a. Puk belh zel tih mai loh chu sum leh pai dinhmun siamthat tuma a hmalakna thawm reng reng hriat tur a awm hek lo. Siamthat tum a hnekin, kan dinhmun chhiat zia sawichhuaktu apiangte chu MNF hruaituten tawngkam buluk tak takin an beilet dur dur reng zawk a ni. Finance Minister pawh ni lo, MNF MLA leh an party hotu thenkhatte chuan Mizoramin sum leh pai harsatna a tawh mek hi sawi mam tumin thapui an thawh mek bawk a. Hei hi mipui zah lohna dik tak a ni a. November 19, 2022-a MNF MLA Pu L. Thangmawia’n, ‘MPCC-in Mizoram leiba cheng vbch. 12553.08 a pung chho anga an tarlan hi khawi atanga data an neih nge? Tuilet hnuah Mizoram leiba hi cheng vbch. 12553.08 a la tling ngai lo hrim hrim,’ a tih phei kha chu thil zahthlak tak a ni a, July 25, 2022-a Finance Department-in RTI an chhannaah chiang taka ziahlan a ni a. Tin, Mizoram Budget bu, Annual Financial Statement 2022-2023 phek 24-nah en theihin a awm reng bawk.
“November 21, 2022-a Hnam Run inkhawma Pu Lalthlengliana, MNF Vice President-in, “Pu Zoramthanga tluka Finance enkawl thiam Mizoramah an la awm lo” a tite phei hi chu MNF-in mipui an tham loh thin zia tilang chiangtu a ni. Finance chungchanga Mizoram dinhmun chhiat zia en hian Pu Zoramthanga, Finance Minister hi fak hun a ni lo a, siamthat duh tak tak tan chuan na taka sawisel hun a ni zawk. MNF sorkar hian Mizoram sum leh pai dinhmun siam that tuma hmalak mekna a nei lo a nih chuan sawi pial tumin hma la tawh suh se.
“Mizoramin sum leh pai harsatna a tawh mek hi ram leh hnam hmangaihtute chuan kan ngai thutak hle tur a ni a, sawi mam tuma tanlakna chi a ni lo. Kum 2008 a Congress sorkar a lo pian khan sum dinhmun sawngnawi tak a rochung a. Term 1-na (2008-2013) chhung phei kha chuan RBI atangin Ways & Means hmangin sum an puk ve deuh reng a ni. Sum dinhmun tha lo hi sorkar lai tan mualphona anga ngaih theih ni mahse Finance Minister, Pu Liansailova leh sorkar hotute khan mipui lakah a lema insawi mam leh sum harsatna thup tum lovin, an sawichhuak mai a, sum harsatna sutkian tumin hma an la a, an hlawhtling hle a nih kha.
“Sum dinhmun tha lo thup tum lova Pu Liansailova hmalakna rawn chhunzawmtu, Finance Minister thar Pu Lalsawta hmalakna chuan rah tha a chhuah a, CAG Report atanga a lan danin kum 2015-16 ah Mizoramin Fiscal Surplus 3.09% lai kan nei. Kum 2015-16 Budget-ah state kan nih hnua a vawi khat nan Surplus Budget (revenue surplus) kan nei tan ve ta a. Kum 2016 June 30 hnu lamah RBI atangin Ways & Means hmangin sum puk a ngai tawh lo bawk a. Congress sorkar liam ta khan MNF sorkar hi cheng vbch tam tak a hnutchhiah hial a ni. MNF sorkar tirh kum 2019 a sum tam zia Pu
“Zoramthanga’n a sawi thin kha, Congress sorkar hnutchhiah sum cheng vaibelchhe tam tak vang a ni.
MNF sorkar hian Revenue surplus (Surplus budget) neih a tum ve thin a, a la hlawhchham zel. Budget Document thenkhata tarlan a nih danin kum 2020-2021 ah Revenue Surplus cheng vbch 763 nei turin an intarlang (project) a, mahse, cheng vbch 799 dawnin an phalo (Deficit) leh si a ni; a awmzia chu vbch 800 dawnin an chawibelh tihna a ni. Kum 2021-2022 ah Revenue Surplus cheng vbch 579 nei turin an in lantir leh a, vbch 188.41 in an phalo (Deficit) leh a. Kum 2022-2023 hian Revenue Surplus vbch 1419 nei turin an inchhut leh a, hei pawh hi mipui hmuha lan mawi tumna mai a ni.
Sorkar Kum Revenue Surplus Neih Beisei zat/BE (in Vaibelchhia) Punna/Chawibelhna (Surplus/Deficit)
(in Vaibelchhia)
2015-2016 1084.16 +1105.55
2016-2017 1283.91 +1167.96
2017-2018 1787.10 +1699.44
2018-2019 1729.81 +1533.90
2019-2020 1443.47 (BE)/-594.73 (RE) +204.30
2020-2021 763.11 -798.62
2021-2022 579.42 -188.41
2022-2023 1419.70 -962.75 (up to Sept. 2022)
Source: Budget Documents 2015-2022
“Congress sorkar leh MNF sorkar hnuaia Mizoram sum leh pai dinhmun inthat hleih dan leh leiba pun dan hi finfiahna (evidence) a awm thlap a ni. Finance Minister Pu Zoramthanga hi Mizoram sum leh pai enkawl thiam a ni tih finfiahna Budget Document-ah hmuh tur a awm lo, Congress sorkar erawh Mizoram sum leh pai dinhmun siam thatu a ni tih finfiahna Budget Docment-ah a awm. Congress party-in sum leh pai dinhmun siamthatna hlawhtling taka a kalpui hnu chuan sorkar leiba tura chhut (budget estimate) aiin a tak tak (Actual) a leiba pawh cheng vbch 571.49 in a tlem zawk hial a.
(2018-2019). MNF sorkar hnuaiah chuan leiba tura an chhut zat aiin a tak tak (Actual) ah leiba hi a tam zawk zel a ni.
SORKAR LEIBA PUN DAN
Kum Budget Estimate (BE)
Vaibelchhia Revised Estimate (RE)
Vaibelchhia A TAK TAK (Actual)
Vaibelchhia Inthlauhna (Actual– BE)
Vaibelchhia
2017-2018 7177.99 7195.03 7300.30 +122.31
2018-2019 7887.04 7992.34 7315.55 -571.49
2019-2020 8447.92 7771.08 8671.79 +223.87
2020-2021 8701.26 9029.34 9881.09 +1179.83
2021-2022 10491.20 11623.22
2022-2023 12553.08
2023-2024 13557.32 (Projection)
Source: Medium Term Fiscal Policy Statement leh RTI chhanna
“Hetianga Mizoram sorkar leiba nasa taka a pun mek lai hian MNF sorkar hian a sum indaihlohna phuhruk turin pukna tur awm a piangah a puk hmiah hmiah zel a. Sorkar leh turte tan pawha rulh huphurhawm khawpin pawisa pukah MNF sorkar hi a huai a. RTI chhanna atanga a lan danin kum 2019 hnu lamah MNF sorkar hian RBI atangin Ways & Means hmangin vawi 164 chuang sum a puk leh der tawh a ni. Kum 2018 Ministry thar pian atanga January 2022 thlenga Mizoram sorkarin sum a puk belh tawh zat chu cheng vbch 3264.65 a tling. (Source: Assembly a Pu Zodintluanga zawhna, Pu Zoramthanga, Hon’ble Finance Minister chhanna) Heng sum pukte hi kum 5 atanga kum 50 thlenga rulh tur (repayment schedule nei) a nih avangin MNF sorkar tlak hnuah pawh sorkar a piangin mipui sumin an la rul tlauh tlauh dawn a ni.
‘A chhelai siam thatu’ ni lova, ‘a thalai tichhetu’ nih leh ‘a chhe lai sawi mam tumtu’ nih inhmeh bik riau sorkar a awm a. Congress party hian Compensation vanga MNF sorkar laia hluihlawn tawh Tuirial Hydel Project a ti hlawhtling a, kum 2017 Dec atanga Tuirial HEP atanga a thlawna kawlphetha Mizoramin kan dawn hlut zawng hi cheng vbch 30 chuang a ni tawh. MNF sorkarin Ar In atana alo hman hawh tir mai mai tawh Falkawn Referral Hospital ti puitlingin, Medical Hospital changtlung tak a din thar leh a, COVID-19 hripui leng karah pawh Mizoram mipuite thlamuanpui tham a tling. Congress party hi Pathian zarah ‘a chhelai siamthatu’ a lo ni tawh thin a, ni leh turin kan inbuatsaih mek. Mipuite tana Nu leh Pa nih tling tak, Sorkar |ha sorkar din kan tum a, mipuite’n min lo ngaichang a, min thlawp turin kan sawm che u a ni,” Dr.Lallianchhunga chuan a ti bawk.
