Aizawl Mihlun Thlahte Inkhawmpui lian “HIGH COUNCIL” vawi 2-na vawiina Aijal Club a neih chu Home Minister Lalchamliana chuan khuallian nia hmanpuiin, “Aizawl thanzelna atan neitu thinlung pu a hmangaih tak tak tu a mamawh tiin; nungcha, thing leh mau humhalh kawngah leh faina kawnga kan la hnufum chhan pawh neitu thinlung kan put loh vang a ni,” a ti.
Lalchamliana chuan, Aizawl Mihlun hmasa te chu an duham lova, tunhma a in leh lo, bawrhsap kaltlanga sorkar in a theh thin thu ah pawh hmun khat an neih tawh chuan midangte tan tiin an pe phal tih sawiin; chu nun zemawi tak chu thangthar ten zirchiang leh se a duh thu a sawi a. Aizawl Mihlun Thlahten midangte tana malsawmna ni tura kumtin Aizawl leh Aizawl daifema an luangchhuak thin chu chhuanawm a tih thu leh Aizawla nu leh pate chuan an fate chherchhoh kawngah, Mizoram nu leh pa ten an entawn ni tur khawpa fanau enkawl puitlin kawngah tan la thar se a duh tih a sawi a. Ruihhlo chuan Mizoramah nasa taka bu a khuar a avangin; a do theih dan kawng awm apianga do tul a tih thu a sawi a. Aizawl chu India ram khawpui zingah pawh kawng tinrenga langtham ni turin a mi chengte an pawimawh hle tih a sawi bawk.
Aizawl Mihlun Thlahte hi kum 2017 khan whatsapp group siamin V. Lalnunthara chuan bul a tan a. Kum 2019 atangin pawl angin an kal chho tan a. Kum 1950 hmalama Aizawla chhungkua inbengbel tawh thlah kal zel ten, in inunauna tih thar nan leh Aizawl hmasawn zel nana an din a ni a. An pawl annual report a, a landanin tunah hian member inziaklut 519 an awm mek a. Aizawl hmunhlu chei that kawngah pawh hma la in; tinhnai khan Sabinga Lung Khatla a mi chu an cheithar bawk.
Aizawl Mihlun Thlahte Inkhawmpui lian HIGH COUNCIL ah hian kum 2023 – 2025 chhunga an pawl hruaitu thlanna an nei nghal a. Chungte chu : V. Lalnunthara, K. Liantlinga, Dr. Vanlalruata, John Rotluangliana, R. Lalsangluaia leh K. Zothanpuii te an ni.
Aizawl Mihlun Thlahte High Council rorelna ah hian agenda hrang hrang lut zingah; Aizawl Mihlun Thlahte pawla inziaklut thei chin kum bithliah chu kum 1950 chu an nemnghet a, sawhsawn tawh lo nise an ti. Aizawl Mihlun Thlahte a tel thei chin area bithliah an neih mek piahlamah Chaltlang leh Tlangnuam te an rinlut a. Aizawl Mihlun Thlahte zingah an kawppuite mihlun thlahte a tel ve duh an awm anih chuan kawng hawn nise tiin an pass a. Mizoram sorkara registration tih thuai an remti bawk a, an pawl flag leh logo duanthar te an pawm bawk.
