MPCC Treasurer leh Thorang bialtu MLA ni bawk Zodintluanga Ralte chuan a bial chhung khaw hrang hrang fan chhunzawm zelin, nimin khan Lungsen leh Belthei khua te a tlawh bakah Putlungasih leh Kauchhuah inkar Rigid Pavement Road KM 3.72 a thui lawmna hun a hman pui bawk a. Kawng hawnnaah hian thu sawiin, Congress party mipui ten kumin hi eptu party ni-a Christmas an hman hnuhnun ber a nih tur thu Thorang bialtu MLA Zodintluanga Ralte chuan a ti.
Kawng thar lawm naah hian thusawiin, Zodintluanga chuan, “MNF sorkarin mipute hnen atanga sum an hmuh theih dan tur zah leh mualpho pawh dawn lovin kawng hrang hrangin an dap nasa hle a ni,” a ti a. “MNF sorkar hian mipuite a theihna zawng zawngah min sawrfu a, min sawrfu hneh luttuk a, Mizoram mipuite MNF sorkar lakah hian an beidawng tawh takzet a ni,” a ti.
Sawi chhunzawm zelin, MNF sorkar chu an khawngaihthlak letling tawh zawk tiin Pu Zodintluanga chuan, “MNF party mi tam zawk ten MNF nih an zak a. An sorkar theihna tur hmanrua atana SEDP-a cheng Nuai 3 sem tum kha, cheng sing 5-ah an tla hniam a, an sem dawn tak tak-a a lan hunah phei chuan cheng 25,000-ah an tla hniam leh a. MNF party hruaitu tam tak zawk SEDP chungchang sawipui dawnin an beng an dawh tha duh tawh lo,” a ti.
MPCC Treasurer chuan, “MNF sorkarah mipui ten beisei tur an neih loh avang leh an beidawn luttuk avangin hmun tinah Congress party zawm thar an pung a, Congress party chuan mipui te kan bum ve dawn lo a,” a ti.
Congress MLA chuan, Congress a sorkar loha Mizoram a harsat zia hre chiangtute chu thingtlang mite an ni, a ti a. Sumdawng, Bank leh Sorkar hnathawkte hian Congress sorkar an mamawh a ni, a ti bawk.
MNF President leh Chief Minister ber pawh a Minister-te zinga miin mipuite hnenah fiamthu thawh nana hmang tawh lo turin a ngen hial a, hetianga CM fiamthu thawh nana hmang lo tura ngen hi Indian ram khawi hmunah mah a la awm lo a, CM chu a thusawi apiangah mipui ten nuihna tur kan zawng mek tawh a ni a ti bawk.
Zodintluanga chuan, “MNF sorkar apiangin Mizoram hi chhiatna namen lo leh rapthlak tak kan tawk ziah a. MNF sorkar Chief Minister Zoramthanga leh a ho te hian uchuak taka sum insiamsakna atan an hmang thiam em em zel bawk a, MNF sorkarin kum khat dawn chauh min la hruai leh tur pawh hi Mizoram hmangaihtu tak takte tan chuan a uihawm tawh takzet a ni,” a ti a. SEDP cheng 25,000 dawng ve hram tawh, a bak MNF sorkar a beisei nei tawh lo, Congress party zawm tur tam tak an awm mek a ti bawk.
Congress MLA chuan Congress Party chuan mipui a ti thlawn ngai lo tih a sawi a, kum 2023-a inthlan Manifesto atan pawh Tang Puina atan Nuaih bi atanga mamawh intawm atana a hman tur anih phei chuan Vaibelchhe tel thleng in tanpuina pek a ni ang, tih a nih thu tarlan a ni a ti bawk.
Thorang bialtu MLA hian a bial khaw hrang hrangah hian Party hrang hrang atanga Congress zawm thar te a lawmlut zel a, a bial hi a fan chhunzawm zel dawn a ni.
