Thorang bialtu MLA Zodintluanga chuan a bial khaw hrang hrang fan chhunzawm zelin, nimin ni 26/11/2022 khan Tuisenchhuah Community Hall lawmnaah thu sawiin, “MNF Sorkarin SEDP a sem dan hi chhuanmang rorel lanna dik tak a ni,” tiin a sawi.
Thorang bialtu MLA Zodintluanga Ralte chuan, “Congress Party chuan miretheite dawm kan nan NLUP kan sem ang kan ti a, kan sem ang kan tih zat kan sem zel a. MNF Sorkar hian SEDP Rs.3,00,000/- sem tur anga mipuia inzawrhna chu, Rs. 50,000/- a tla hniamin, an sem dawn tak takah chuan Rs. 25000-ah an tla hniam leh a, he Rs. 25,000/- an sem hi engtia peipun tur nge, eng atana hman tur nge tih pawh a dawngtu ten an hre lo a, an tawng pawng sem pawp pawp ringet mai a ni,” a ti a.
Congress MLA Zodintluanga chuan, “Congress Party ten NLUP hmanga mirethei zawkte khaichhuah hna kan lo thawh tawh thinna kha vawiinah hian a rah chhuah a taka hmuh theih tur tam tak a awm tawh a ni,” a ti a.
Zodintluanga chuan a bial chhungah pawh hian NLUP hmunphiah leh serthlum hmangin chhungkaw tam tak ten eizawnna ngelnghet neih phah tawhin, kum khatah cheng nuai tam an lalut thei tawh tih sawiin, “Vawiina MNF sorkarin SEDP tia Rs.25,000/- an tawngpawng sem mek hi chuan rah tha a rinawm loh a. Mirethei leh harsa zawkte dawm kan tumna thinlung nen an sem tak tak em tih pawh chhut ngun ngai tak a ni,” a ti bawk.
SEDP Healthcare chungchangah a beidawnthlak zia sawiin, Zodintluanga chuan, “Assembly House zahawm takah CM leh Finance changtu Pu Zoramthanga chuan SEDP Healthcare cheng nuai hnih chhungkaw tin tan a awm tih a sawi a. Tun hnaiah Journalist pakhatin RTI hmanga a zawhna chhannah chuan SEDP Healthceare hi a lo awm hauh lo mai. Mizoram State Health Care Scheme chiah a lo awm a, chutah chuan tunah hian chhungkaw 39505 lai inziaklutin pawisa tling khawm cheng vaibelchhe nga dawn lai chu mipuiah ni lovin thawktute hlawh leh inrelbawlna atana hman chauh a lo ni, tah a tichhuak zawk a ni,” a ti.
ZPM chu an awm loh na khua apiangah tam angin an insawi, tih MPCC Treasurer Zodintluanga chuan a sawi a.
“ZPM Leader Pu Lalduhawma hian, ‘Mizoram siamtha tur hian Mizote vote hmang bak hian tlin a ngai lem lo. Mizoram hi Mizote ta a ni a, Chakma ram a ni ve lo. An awm awma awmtir mai mai tur a ni a, an vote tlemte it avangin ZPM kan kal dawn lo. Kan sawrkar a nih chuan eng nge lo thleng kan en ang chu,’ tiin hmun tinah tawngkam a thlah a. A thusawi atanga kum khat pawh ral hmain, Chakma leh Bru khua-ah unit dinna tur a zawng kual leh duk duk a, hmun tam takah an din fel der tawh a ni,” a ti a.
ZPM hi mi thar an ni lo , hmana UDA inti te, ZNP anga lo inzuar tawh te tho kha an ni, MPCC Treasurer chuan a ti a.
Zodintluanga chuan, “ZPM hruaitu lute chu ui leh kel thlun pawlh ang mai an ni a, mipui hmuha in ngeih awm taka an lan theihna turin luchunga kut nghat ten an in tawngtai a, an in tawngtai lai thlalak hi nasa takin an vawrh darh dun a ni. ZPM kan tih te hi tu pawlah mah awm thei lo, Rotekawla sepa anga ‘kei ka ni’ inti an ni a. Pawl inkaihhruaina hnuaia awm hlei thei lo an ni,” Congress Legislature Party Leader chuan a ti.
ZPM chu MLA hlawh sang lak pawh mipuiah a duh lo ber anga lang, hlawh pung la hmasa saa tang leh si; VUC in MLA te motor-a MLA tih tar loh tur an tih lai a, MLA zinga an motor-a MLA tih a kilhna nen a nghet taka kilhbet awmchhun an ni leh bawk tiin Congress MLA chuan a sawi.
“Congress Party chuan tang puihna hmangin a tum tak takte cheng nuai tel atanga vaibelchhe tel thlengin kan puih dawn a, tang ngaihna hre lo pawh kan pui ang. Congress chuan ‘kan ti ang’ kan tih chu kan ti zel thin a. He that loh theih lohna bawm avang hian Mizoram mipui ten Congress hi min thlang tling leh dawn a. ZPM chu an tan a tawp tawh avang tun term hi an thlen san ber a ni dawn a, kum 2023 Inthlan puiah congress lo chu sorkar tur an awm lo,” Zodintluanga MLA chuan a ti.
Tuisenchhuah Community Hall lawmna inkhawm hi Tuisenchhuah VCP-in a kaihruai a, khawtlangin Hall lawm ruai an theh nghal bawk a. Thorang bialtu MLA hian a bial a fan chhunzawm zel a a ni.
