Mizo Students’ Union General Headquarters, Aizawl chuan Interaction Session with Hon’ble Speaker & Discussion on Nature of the Assembly House buatsaihin vawiin khan Speaker Lalrinliana Sailo leh zirlai 80 chuangin inkawm hona an nei a, he hunah hian Higher Secondary School leh College zirlai zirna atana pawimawh tak tak leh fuihna thu Speaker hnen a\angin ngaihthlak a ni.
MSU chuan Mizorama kan rorelna in sang ber Assembly House-a kan Speaker zahawm tak nena inkawmna hun neih a ni chu lawmawm a ti a, a hmun ngeia zirlaite hriat tur pawimawh tak tak leh vei zâwngte sawi ho a nih bakah zawhna hrang hrangte chhân a ni chu hlâwk a tiin, kan ram inrelbawlna chungchang zirlaite’n kan veia kan hriat chian lehzual hi MSU chuan kan hnam humhalhna kawngah a tul a ti tak zet a ni.
Lalrinliana Sailo chuan Assembly chhunga Committee peng hrang hrang pawimawh dan te, sawrkar lai MLA leh opposition MLA pawimawh dan te, India Constitution chungchang te leh, Speaker leh MLA ni chunga a tawnhriat hrang hrangte a sawi bawk a. Kan ram roreltute hi an zavaiin mi tha tak tak an ni a, Social media-ah a chhe zawnga sawi vak vak lo tur te, zuk leh hmuam laka fihlim tura fuihin, mahni in chhung dinhmun a harsa deuh a nih pawhin, inthlahrang hauh lova, harsatna avanga mahni indah hnuai mai lovin, zâm mai lova hlawhtling tura bei hram hram tura chah chungin he hun hi a titawp a ni.
